Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 412 Hüküm no: 455 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden Hadice bt. Hasan ile Abdullah Ağa’nın boşanması Tatlîk Mahmiye-i İslâmbol’da Koca Mustafa Paşa Câmi‘-i şerîfi kurbünde Bâzergân mahallesinde sâkine Hadice bt. Hasan nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân es-Seyyid Abdülaziz b. es-Seyyid eş-Şeyh Ahmed Nureddin ve es-Seyyid Mehmed Efendi b. es-Seyyid Ali şehâdetleriyle şer‘an sâbit olan es-Seyyid Hüseyin Efendi b. es-Seyyid el-Hâc Hasan meclis-i şer‘-i şerîf-i enverde müvekkile-i mezbûrenin zevc-i mutallıkı işbu bâ‘isü’l-kitâb Abdullah Ağa b. Musa nâm kimesne mahzarında bi’l-vekâle ikrâr-ı tam ve takrîr-i kelâm edip mezbûr Abdullah Ağa müvekkilem mezbûre Hadice Hatun’un yirmi beş guruş mehr-i müeccel tesmiyesiyle zevc-i dâhili olduğu hâlde târih-i kitâb günü bâyinen tatlîk etmekle zimmetinde ma‘kūdun-aleyh olan mehr-i mezkûr yirmi beş guruş ile nafaka-i iddet-i mu‘ayyene ve meûnet-i süknâsı içün bi’t-terâzî beynlerinde ta‘yîn olunan iki buçuk guruş ki cem‘an yirmi yedi buçuk guruşu mezbûr Abdullah Ağa zevce-i mutallakası müvekkilem mezbûreye def‘ ve teslîm eyledikde ol dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mutâlebâtdan müvekkilem mezbûre Hadice Hatun zevci mezbûr Abdullah Ağa’nın zimmetini ibrâ ve ıskāt eyledikde ol dahi kezâlik hukūk-ı zevciyete müte‘allika âmme-i de‘âvîden müvekkilem mezbûrenin zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 27 Ca sene 1197 Şühûdü’l-hâl: Ahmed Ağa b. İsmail, es-Seyyid İsa b. Abdullah, Derviş Mustafa b. el-Hâc Hasan, es-Seyyid Ali Efendi b. İsmail, Molla Ali b. Halil, es-Seyyid Mehmed Efendi b. es-Seyyid Ali, es-Seyyid el-Hâc Ömer b. Süleyman.