Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 412 Hüküm no: 456 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Burmalı Mescid mahallesinden Mehmed Ağa’nın yevmi otuz bir akçelik çavuşluk esamisini Bektaş Ağa’ya ferağı Esâme kasr-ı yedi ma‘a çavuşluk Mahmiye-i İslâmbol’da Şehzâde Câmi‘-i şerîfi kurbünde Burmalı Mescid mahallesinde sâkin Mehmed Ağa b. Veliyüddin nâm kimesne meclis-i şer‘-i şerîf-i enverde işbu bâ‘isü’l-kitâb Bektaş Ağa b. İsmail nâm kimesne mahzarında ikrâr ve takrîr-i kelâm edip benim Silahdâr Ocağı’nda yedinci bölükde Hüseyin nâm ismiyle mutasarrıf olduğum yevmî otuz bir akçe çavuşluk esâmîmi bundan akdem hüsn-i rızâ ve ihtiyârımla mezbûr Bektaş Ağa’ya ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an altı yüz yirmi guruş def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Bektaş Ağa’nın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr altı yüz yirmi guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a bi’t-taleb. Fî 28 min-Ca sene 1197 Şühûdü’l-hâl: Es-Seyyid Mehmed Ağa b. Hüseyin, Süleyman Çavuş Ağa b. İsmail, Yusuf Ağa b. Mehmed, Mehmed Tâhir Ağa b. Mustafa, Mehmed Çavuş Ağa b. Abdullah, Molla Ali b. Halil, Bağdadlı Hüseyin Ağa b. Veliyüddin, Subaşı İbrahim Ağa.