Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 413 Hüküm no: 457 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinden olan ve Abdülmuttalib b. İbrahim’den boşanmış olan Nimetullah bt. Mustafa’ya hamile olduğu için nafaka takdiri Hammâliye nafakası Mahmiye-i İslâmbol’da Çerâğī Hasan mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Nimetullah bt. Mustafa nâm hatun meclis-i şer‘-i şerîf-i enverde zevc-i mutallıkı es-Seyyid Abdülmuttalib b. es-Seyyid İbrahim nâm kimesne mahzarında takrîr-i kelâm ve bast-ı merâm edip zevc-i mutallıkım mezbûrun firâşından hâsıl hamlim olmağla vaz‘-ı haml ile iddetim münkaziye oluncaya değin nafaka ve meûnet-i süknâm içün zevc-i mutallıkım mezbûr es-Seyyid Abdülmuttalib üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi mezbûre Nimetullah Hatun’un ber-vech-i muharrer vaz‘-ı hamli ile iddeti münkaziye oluncaya değin nafaka ve meûnet-i süknâsı içün zevc-i mutallıkı mezbûr es-Seyyid Abdülmuttalib üzerine bi’t-terâzî târih-i kitâbdan küllü yevm sekiz akçe farz ve takdîr edip meblağ-ı mefrûz-ı mezkûru mezbûre Nimetullah Hatun kendi nafaka ve sâir havâyic-i lâzımesine harc ü sarfa ve vakt-i zarûretde istidâneye ve inde’z-zafer zevc-i mutallıkı mezbûr es-Seyyid Abdülmuttalib üzerine rücû‘a mezbûre Nimetullah Hatun’a izin vermeğin mâ-vaka‘a bi’t-taleb. Fî 28 min-Ca sene 1197 Şühûdü’l-hâl: Molla Ali b. Halil, Salih b. Halil, Molla Mehmed b. Mustafa, Mustafa b. Mustafa ve gayruhum.