Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 243 Hüküm no: 198 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi’nin menzilini hanımı ile kızlarına satması Medîne-i Üsküdar’da Hâce Hesna Hatun mahallesinde sâkin es-Seyyid Süleyman Efendi b. Mustafa b. Abdullah tarafından zikri âtî husûsu ikrâr ve i‘tâ-i hüccete vekîl olduğu Ömer Ağa ve li-ebeveyn er karındaşı Mustafa Ağa ibney Mehmed Rüstem şehâdetleriyle ber-nehc-i şer‘î sâbit olan eşrâf-ı kuzâtdan Mehmed Asım Efendi b. el-Hâc Abdullah Efendi meclis-i şer‘-i şerîf-i enverde sâhibâtü’l-kitâb müvekkil-i mûmâ-ileyh es-Seyyid Süleyman Efendi’nin halîlesi Habibe Hanım bt. el-Hâc Mehmed ve sulbiye-i kebîre kerîmeleri Şerife Emine Şevkiye ve Şerîfe Zekiye Hanımlar taraflarından husûs-ı âti’l-beyânda tasdîka vekîl-i müseccel-i şer‘îleri Mehmed Hamdi Efendi b. Salih mahzarında bi’l-vekâle ikrâr-ı tâm ve takrîr-i kelâm edip müvekkilim mûmâ-ileyh akd-i âti’z-zikrin sudûruna değin bâ-hüccet müstakıllen yedimde mülküm olup mahalle-i merkūmede vâki‘ bir tarafdan müteveffâ Fâtıma Hanım veresesi menzili ve üç tarafdan tarîk-i âm ile mahdûd müştemilât-ı ma‘lûmeyi hâvî bir bâb menzilin dört sehm i‘tibârıyla iki sehmi müvekkilât-ı mezbûrâtdan halîlem mezbûre Habibe Hanım’a altı bin guruşa ve bir sehmini merkūme Şerife Emine Şevkiye Hanım’a üç bin guruşa ve mâ‘adâ bir sehmi dahi mezbûre Şerife Zekiye Hanım’a üç bin guruşa tarafeynden îcâb ve kabûlü hâvî şürût-ı müfside ve muvâza‘adan ârî bey‘-i bâtt-ı sahîh-i şer‘î ile bey‘ ve temlîk ve her birine vech-i lâyıkıyla teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eyledikden sonra semeni olan cem‘an on iki bin guruş mutâlebesine müte‘allika da‘vâdan halîlem ve kerîmelerim mezbûrât Habibe ve Şerife Emine Şevkiye ve Şerîfe Zekiye Hanımların zimmetlerini kabûlü hâvî ibrâ ve iskāt eyledim. Ba‘de’l-yevm menzil-i mahdûd-ı mezkûrun ber-minvâl-i muharrer dört sehm i‘tibârıyla iki sehmi halîlem mezbûre Habibe Hanım’ın ve bir sehmi merkūme Emine Şevkiye Hanım’ın ve mâ‘adâ bir sehmi dahi mezbûre Şerife Zekiye Hanım’ın mülk-i müşterâları ve hakk-ı sırfları olup benim kat‘an alâka ve medhalim kalmamışdır dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti şehri Rebî‘i’l-evvel sene [1]257. Şuhûdü’l-hâl: Muhzır Salih Ağa b. İbrahim, Ömer Ağa b. Abdullah, Ali Ağa b. Musa, Mustafa Ağa b. Ali ve gayruhum.