Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 414 Hüküm no: 458 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraç Doğan mahallesinden Safiye bt. Abdullah’ın kocası Mustafa Ağa’ya bazı eşyalarını hibe edip bazılarını da sattığı ve beraber kaldıkları evdeki eşyada da hakkı olmadığına dair takriri Eşyâ mübâya‘ası ve semenini deyne takas Mahmiye-i İslâmbol’da Sarrâc Doğan mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Safiye bt. Abdullah nâm hatun meclis-i şer‘-i şerîf-i enverde hâlâ zevci işbu bâ‘isü’l-kitâb Mustafa Ağa b. Abdullah nâm kimesne mahzarında ikrâr-ı tam ve takrîr-i kelâm edip zevcim mezbûr zimmetinde ma‘kūdun-aleyh olan yirmi beş guruş mehr-i müeccelim ile yedimde mâlım olan yirmi beş miskāl bir çift altın bilezik ve iki altın yüzüğümü hibe-i sahîha-i şer‘iye ile zevcim mezbûr Mustafa Ağa’ya hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz ve kabûl eyledikden sonra eşyâ-i memlûkemden bâ-defter-i müfredât yün memlû on beledî yasdık ve dört minder ma‘a çit mak‘ad ve dört şilte ve bir beledî döşek ma‘a şilte ve üç döşek çârşebi ve iki baş yasdığı ve iki yüz yasdığı ve iki koltuk yasdığı ve üç yemeni yorgan ma‘a çârşeb ve bir orta keçesi ve bir kapı perdesi ve bir mısır hasırı ve iki seccâde ve bir sofra ma‘a peşkir ve beş makrame ve bir keremsûda kaplı kākum kürk ve bir zerdeva kürk çiçekli ve Şam alacası yedi entari ve bir atlas cübbe ve bir kemhâ şerîtli cübbe ve beş sahan bâ-kapak ve üç tencere ma‘a kapak ve bir tâbe ve bir şorba tası ve bir sini ve iki tepsi ve bir güğüm ve bir leğen ma‘a ibrik ve iki sepet sandığımı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Mustafa Ağa’ya yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli guruşu bundan akdem zevcim mezbûr yedinden müstedân ve makbûz cihet-i karzdan yüz elli guruş deynime takas ve mahsûb eylediğimde ol dahi mukāssa ve kabûl eyledi, ba‘de’l-yevm deyn-i mezkûr yüz elli guruşdan benim ve mehr-i mezkûr yirmi beş guruşdan zevcim mezbûr Mustafa Ağa’nın zimmetimiz berî ve zikr olunan altın bilezik ve yüzükler mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mukırre-i mezbûre Safiye Hatun yine meclis-i şer‘de zevci mezbûr mahzarında i‘âde-i kelâm edip zevcim mezbûr ile mahalle-i mezbûrede vâki‘ mâ‘an sâkine olduğum menzilde mevcûd bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ zevcim mezbûr Mustafa Ağa’nın mâlı ve mülkü olup benim aslâ alâka ve medhalim yokdur dedikde mâ-vaka‘a bi’t-taleb. Fî 28 min-Ca sene 1197 Şühûdü’l-hâl: Abdülhalim Efendi b. Mehmed, es-Seyyid İbrahim Efendi b. es-Seyyid el-Hâc Hüseyin, Hafız es-Seyyid Ahmed Efendi b. es-Seyyid Ali, es-Seyyid Mehmed Efendi b. es-Seyyid Ali, Salih Efendi b. Halil, İbrahim Efendi b. Mustafa imâm-ı mahalle-i Kâtib Muslihiddin, Molla Ali b. Halil, Hasan Çavuş Ağa b. Mehmed, es-Seyyid Ali Çavuş Ağa b. Musa, Hoca Salih Efendi b. Mehmed.