Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 415 Hüküm no: 459 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraç Doğan mahallesinden Mehmed b. İbrahim’in evlatlığı Mustafa’ya nafaka takdiri Tebennî-i sagīr Mahmiye-i İslâmbol’da Sarrâc Doğan mahallesinde sâkin işbu bâ‘isü’l-kitâb es-Seyyid Mehmed b. es-Seyyid İbrahim nâm kimesne meclis-i şer‘-i şerîf-i enverde takrîr-i kelâm ve bast-ı merâm edip hâlâ li-ecli’t-tebennî hacr u terbiyemde olan takrîben dört yaşında Mustafa b. Abdullah nâm sagīrin mâlı olmayıp nafaka ve kisveye ihtiyâcı olmağla sagīr-i mezbûrun nafaka ve kisve-bahâsı içün men-lehû hakku’t-taleb ve’l-ahz üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīr-i mezbûrun ber-vech-i muharrer nafaka ve kisve-bahâsı içün men-lehû hakku’t-taleb ve’l-ahz üzerine târih-i kitâbdan küllü yevm üçer para farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisvesine harc ü sarfa ve lede’l-iktizâ istidâneye ve inde’z-zafer men-lehû hakku’t-taleb ve’l-ahz üzerine rücû‘a mezbûr es-Seyyid Mehmed’e izin vermeğin mâ-vaka‘a bi’t-taleb. Fî 28 min-Ca sene 1197 Eş-şâhidûnü’s-sâbıkūn.