Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 415 Hüküm no: 460 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çıkrıkçı Kemal mahallesinden Süleyman b. İsmail ve Abdulkadir b. Mehmed’in ortak sahip oldukları şekerci dükkânın âletlerini borçlarına karşılık Rokof v. Kostandi’ye sattıkları Şekerci gediği mübâya‘ası ve semenini deyne takas Şekerci tâifesinden olup mahmiye-i İslâmbol’da Sarıgez kurbünde Çıkrıkçı Kemal mahallesinde sâkinler es-Seyyid Süleyman b. İsmail ve Abdulkadir b. Mehmed nâm kimesneler meclis-i şer‘-i şerîf-i enverde işbu hâmilü’r-rakīm Rokof v. Kostandi nâm zimmî tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Avram v. Mosi nâm Yahûdî muvâcehesinde her biri ikrâr ve takrîr-i kelâm edip akd-i âti’z-zikrin sudûruna değin yedimizde münâsafeten mülk ve hakkımız olup mahalle-i mezbûrede vâki‘ ma‘lûmü’l-hudûd üç kepenk bir bâb şekerci dükkânı derûnunda mevcûd beyne’l-hıref gedik ta‘bîr olunur bir kazgan ve iki tencere ve bir kefçe ma‘a kefgir ve iki mikrâz ve beş bâdiye ve iki kutu ve üç mühür ve sâir âlât-ı lâzıme-i ma‘lûmemizi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile müvekkil-i merkūm Rokof zimmîye bin altı yüz otuz dört guruşa bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr bin altı yüz otuz dört guruşu mukaddemâ müvekkil-i merkūm Rokof zimmî yedinden müstedân ve makbûz cihet-i karzdan bâ-temessük bin altı yüz otuz dört guruş deynimize takas ve mahsûb eylediğimizde ol dahi mukāssa ve kabûl eyledi, ba‘de’l-yevm deyn-i mezkûrdan zimmetimiz berî ve mârrü’z-zikr [gedik] ta‘bîr olunan eşyâ-i muharrere-i mezkûre ve sâir âlât-ı lâzıme-i ma‘lûme müvekkil-i merkūm Rokof zimmînin mülk-i müşterâsı ve hakk-ı sarfı olup bizim kat‘a alâka ve medhalimiz kalmamışdır dediklerinde gıbbe’t-tasdîki’ş-şer‘î mâ-vaka‘a bi’t-taleb. Fî 28 min-Ca sene 1197 Şühûdü’l-hâl: Ahmed Ağa b. Mustafa kethudâ, Ahmed b. Ömer yiğitbaşı, Sultan Mehmedli el-Hâc Mustafa b. Mehmed, Dikilitaşlı Ali b. Mustafa, Şehzâdeli Ömer Usta b. Mehmed, Molla Ali b. Halil, Mahmud Paşalı Küçük Mustafa b. Hüseyin, Hafız Osman b. Ahmed, Koca Mustafa Paşalı Hüseyin Usta b. Mahmud, Sîmkeşhâneli Mustafa b. Süleyman, Uzunçarşılı İbrahim Usta b. Halil ve gayruhum.