Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 416 Hüküm no: 461 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boşanmış olan Mimaracem mahallesinden Hadice bt. Abdullah ile Mustafa Efendi’nin birbirlerinin zimmetini ibra ettikleri Tatlîk Mahmiye-i İslâmbol’da Mi‘mâr Acem mahallesinde sâkine ve zâtı vech-i şer‘î üzere mu‘arrefe olan Hadice bt. Abdullah nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb el-Hâc Mustafa Efendi b. Ahmed mahzarında ikrâr ve takrîr-i kelâm edip mezbûr el-Hâc Mustafa Efendi zevc-i dâhilim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan yüz guruş mehr-i müeccel hakkım ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan on guruş ki cem‘an yüz on guruşu zevc-i mutallıkım mezbûr el-Hâc Mustafa Efendi işbu meclis-i şer‘de bana def‘ ve teslîm eyledikde ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr el-Hâc Mustafa Efendi’nin zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i da‘vâdan benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 28 min-Ca sene 1197 Şühûdü’l-hâl: Mehmed Ağa b. Selim, Ahmed Çavuş Ağa b. Halil, Bostânî İbrahim b. Ahmed, Derzi Ömer Ağa b. Hüseyin, Molla Ali b. Halil.