Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 417 Hüküm no: 462 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Kestel mahallesinde Hadice bt. Osman’ın ev işlerinde çalışan Ayşe bt. Osman’ın, üç yıllık çalışmasının karşılığı olan parayı alarak Hadice’nin zimmetini ibra ettiği Ecr-i mislinden ibrâ Mahmiye-i İslâmbol’da Kırkdörtkapısı kurbünde Molla Kestel mahallesinde sâkine takrîben on iki yaşında olup rü’yet-i dem-i hayzla bulûğunu mu‘terife ve zâtı ta‘rîf-i şer‘î ile mu‘arrefe olan Âişe bt. Hüseyin nâm bikr-i bâliğa meclis-i şer‘-i şerîf-i enverde işbu bâ‘isetü’l-vesîka Hadice bt. Osman nâm hatunun zevci ve tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan el-Hâc Halil Ağa b. Abdullah nâm kimesne mahzarında ikrâr-ı tam ve takrîr-i kelâm edip müvekkile-i mezbûre Hadice Hatun bundan akdem merhameten beni yanına alıp sıgār ve kiberim hâllerinde târih-i kitâba gelince üç sene mikdârı ba‘zı menzili hizmetinde beni istihdâm etmekle sinîn-i mezkûrede sebk eden hizmetimin ecr-i mislini ben bu esnâda müvekkile-i mezbûre Hadice Hatun’dan taleb ve da‘vâya tesaddî etmiş idim. El-hâletü hâzihî beynimizde muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni müvekkile-i mezbûre Hadice Hatun ile nakid on iki guruş ve bir cedîd şali entari ve bir bogasi hırka üzerlerine inşâ-i akd-i sulh eylediklerinde ben dahi mezkûru kabûl ve bedel-i sulh olan meblağ-ı mezbûr on iki guruş ile zikr olunan entari ve hırkayı yedinden tamamen ahz ü kabz edip sinîn-i mezkûrede sebk eden hizmetimin ecr-i misline müte‘allika âmme-i de‘âvî ve kâffe-i mutâlebâtdan müvekkile-i mezbûre Hadice Hatun ile zevci vekîli mezbûr el-Hâc Halil Ağa’dan her birinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mukırre-i mezbûre Âişe’nin anası Fatıma bt. İsmail nâm hatun zâtı ba‘de’t-ta‘rîf meclis-i şer‘de vekîl-i mezbûr el-Hâc Halil Ağa mahzarında takrîr-i kelâm edip eğer kızım mezbûr Âişe ba‘de zamânin adem-i bulûğ iddi‘âsıyla mezbûre Hadice Hatun ve vekîli mezbûr el-Hâc Halil Ağa’dan ecr-i misil mutâlebe ve şer‘an bir nesne ahz eder ise me’hûzuna ben kefîl ve zâmin oldum dedikde mâ-vaka‘a bi’t-taleb. Fî 26 Ca sene 1197 Şühûdü’l-hâl: Buhûrî es-Seyyid Mehmed, Osman b. Mehmed, Molla Ali b. Halil, Ahmed b. Mehmed, Mustafa b. Mustafa.