Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 418 Hüküm no: 463 Orijinal metin no: [67a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza mahallesinden on iki yaşındaki Ayşe bt. Mehmed ile Ebubekir Beşe’nin boşanması Muhâla‘a Mahmiye-i İslâmbol’da el-Hâc Hamza mahallesinde sâkine takrîben on iki yaşında olup rü’yet-i dem-i hayzla bulûğunu mu‘terife ve zâtı vech-i şer‘î üzere mu‘arrefe olan Âişe bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Ebûbekir Beşe b. İsmail nâm kimesne mahzarında ikrâr ve takrîr-i kelâm edip mezbûr Ebûbekir Beşe zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan on beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ebûbekir Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve hîn-i akidde mehr-i mu‘accel tesmiye olunan kıtık memlû iki beledî yasdık ve bir minder ve bir yorgan ve bir tencere ve bir sahan ve bir şali entari ve bir altın yüzük ve bir çuka ferâceye müte‘allika âmme-i de‘âvî ve kâffe-i mutâlebâtdan ben zevcim mezbûr Ebûbekir Beşe’nin zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mukırre-i mezbûrenin li-ebeveyn kız karındaşı kezâlik zâtı mu‘arrefe olan Fatıma nâm hatun meclis-i şer‘de mezbûr Ebûbekir Beşe mahzarında takrîr-i kelâm edip eğer kız karındaşım mezbûre Âişe Hatun ba‘de zamânin adem-i bulûğ iddi‘âsıyla zevci mezbûrdan huzûr-ı hâkimde mehr-i mezkûruna müte‘allika da‘vâ ve şer‘an nesne ahz eder ise mikdâr-ı me’hûzuna ben kefîl ve zâmin oldum dedikde mâ-vaka‘a bi’t-taleb. Fî 29 min-Ca sene 1197 Şühûdü’l-hâl: Mustafa Çavuş b. İbrahim, Molla Ali b. Halil, Salih b. Halil, Mustafa b. Mustafa, el-Hâc Hasan b. Osman.