Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 418 Hüküm no: 464 Orijinal metin no: [67a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. İbrahim’in Arabacı Bayezid mahallesindeki arsada bulunan hissesini kardeşi Mustafa Beşe’ye sattığı Arsadan hisse mübâya‘ası Mahrûse-i Galata’ya muzâfe Tophâne kasabasında Acıçeşme mahallesinde sâkine ve zâtı vech-i şer‘î üzere mu‘arrefe olan Fatıma bt. İbrahim nâm hatun meclis-i şer‘-i şerîf-i enverde li-ebeveyn er karındaşı işbu bâ‘isü’l-kitâb Mustafa Beşe mahzarında ikrâr ve takrîr-i kelâm edip mahmiye-i İslâmbol’da Arabacı Bâyezid mahallesinde vâki‘ bir tarafdan İbrahim menzili ve bir tarafdan Bağçevân Mustafa menzili ve bir tarafdan bostan ve bir tarafdan tarîk-i hâs ile mahdûd bir bâb mülk menzil arsasının sekiz sehm i‘tibârıyla iki sehmi müşterî-i mezbûrun ve üç sehmi âhar li-ebeveyn karındaşım Mehmed Emin Beşe’nin ve birer sehmden iki sehmi Ali ve Âişe Hatun’un ve bir sehmi dahi benim bâ-hüccet-i şer‘iye irsen ve şirâen yedimizde mülk ve hakkımız olmağın ben arsa-i mahdûde-i mezkûrede ber-vech-i muharrer mâlike olduğum bir sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşım mezbûr Mustafa Beşe’ye otuz beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz beş guruşu karındaşım mezbûr Mustafa Bey yedinden tamamen ahz ü kabz eyledim, ba‘de’l-yevm arsa-i mahdûde-i mezkûrenin bir sehminde benim kat‘a alâka ve medhalim kalmayıp iki sehmi irsen ve bir sehmi şirâen mülk-i sahîh ve hakk-ı sarîhi olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî-selhi Cumâdelûlâ sene 1197 Şühûdü’l-hâl: İbrahim b. İsmail, İsmail b. Mehmed, Mehmed Ağa b. Mustafa, Molla Ali b. Halil, Salih b. Halil.