Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 420 Hüküm no: 466 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinde Ahmed b. Abdullah’ın boşamış olduğu hamile karısı Safiye’ye nafaka takdiri Hammâliye nafakası Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Safiye bt. Abdullah nâm hatun meclis-i şer‘-i şerîf-i enverde zevc-i muhâlı‘ı Ahmed b. Abdullah nâm kimesne mahzarında takrîr-i kelâm ve bast-ı merâm edip zevc-i muhâlı‘ım mezbûrun firâşından hâsıl hamlim olmağla vaz‘-ı haml ile iddetim münkaziye oluncaya değin nafaka ve meûnet-i süknâm zevc-i muhâlı‘ım mezbûr Ahmed üzerine kıbel-i şer‘den kadr-ı ma‘rûf meblağ farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi mezbûre Safiye Hatun’un ber-vech-i muharrer vaz‘-ı haml ile iddeti münkaziye oluncaya değin nafaka-i iddet ve meûnet-i süknâsı içün zevc-i muhâlı‘ı mezbûr Ahmed üzerine bi’t-terâzî târih-i kitâbdan küllü yevm üçer para farz ve takdîr edip meblağ-ı mefrûz-ı mezkûru mezbûre Safiye Hatun kendi nafaka ve sâir havâyic-i lâzımesine harc ve vakt-i zarûretde istidâneye ve inde’z-zafer zevc-i muhâlı‘ı mezbûr Ahmed üzerine rücû‘a mezbûre Safiye Hatun’a izin vermeğin mâ-vaka‘a bi’t-taleb. Fî 29 min-Ca Sene 1197 Şühûdü’l-hâl: Hacı Süleyman b. Abdullah, Molla Ali b. Halil, Salih b. Halil, Mustafa b. Mustafa.