Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 420 Hüküm no: 467 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un Gedikpaşa Camii Dersiye Vakfı için vakfettiği evin vakfiyesi yanmış olup evin vakfa ait olduğuna dair şahitler olduğu İstihbâr-ı vakfiye 15 guruş üzerine zam Ashâb-ı hayrâtdan merhûme Zeyneb Hatun bt. Abdullah b. Abdullah sâhibetü’l-hayrın mahmiye-i İslâmbol’da Gedikpaşa Câmi‘-i şerîfinde vaz‘ eylediği Dersiye Vakfı’nın bâ-berât-ı âlî-şân hâlâ mütevellîsi olup mahmiye-i mezbûrede Koca Mustafa Paşa mahallesinde sâkin işbu bâ‘isü’l-kitâb Ali Ağa b. İsmail nâm kimesne meclis-i şer‘-i hatîr-i lâzımü’t-tevkīrde bi’t-tevliye takrîr-i kelâm ve ta‘bîr ani’l-merâm edip işbu yedimde olan bir kıt‘a vakfiye-i ma‘mûlün-bihâ nâtıka olduğu üzere vâkıfe-i mezbûre Zeyneb Hatun hâl-i hayatında bin yüz yetmiş üç senesi Recebi’l-ferd’inin on beşinci günü etyab-ı mâlından bin beş yüz guruş nukūdunu ba‘de’l-ifrâz nukūd-ı mezbûreyi hasbeten lillâh vakf-ı sahîh ile vakf ve habsedip şöyle şurût ve ta‘yîn eyledi ki, nukūd-ı mezbûre bâ-yed-i mütevellî akāra tebdîl olunup icâre-i müeccelesinden hâsıl galleden mârrü’z-zikr Gedikpaşa Câmi‘-i şerîfinde haftada bir gün tâlibîne ilm-i nâfi ta‘lîm olunmak üzere vaz‘ eylediği dersiyenin müderrisine yevmî altı akçe vazîfe ve yine galle-i mezbûreden yevmî bir akçe Hafız-ı seccâde vazîfesi olup câmi‘-i merkūmda kayyim olan kimesne ba‘de itmâmi’l-hademe vazîfe-i mersûmeye mutasarrıf ola ve galle-i mezbûreden yevmî bir akçe kitâbet ve bir akçe cibâyet ve bir akçe tevliyet vazîfeleri ola ve müsakkafât-ı vakfdan mahlûl vâki‘ olup âhara îcâr olundukda icâre-i mu‘accelesinden hâsıl galle yine akāra tebdîl oluna ve tevliyet-i vakf-ı mezbûr ile gallesinin vezâif-i mezkûreden fazlasına hayatda oldukça kendi mutasarrıfe olup vefâtından sonra zevci Sıdkı Ali Efendi mutasarrıf ola ve onun dahi vefâtından sonra kendi evlâdı ve evlâd-ı evlâdı ve evlâd-ı evlâd-ı evlâdının batnen ba‘de batnin ekber ve erşedi mutasarrıflar olalar ba‘de’l-inkırâz utekā ve atikātı ve onların evlâdı ve evlâd-ı evlâdı ve evlâd-ı evlâd-ı evlâdı kezâlik şart-ı mezkûr ile mutasarrıflar olalar ba‘de’l-inkırâzi’l-küll bir müstakīm kimesne re’y-i hâkimle vakf-ı mezbûra mütevellî olup gallesinin fazlasıyla dersiye-i mezbûre vazîfesi yevmî on akçeye tekmîl olundukdan sonra fazlası rakabe-i vakf içün yed-i mütevellîde hıfz oluna ve cihât-ı muharrere-i mezkûre ibtidâ veyâhûd mahlûle oldukda kendi zaman-ı tevliyetinde ancak kendi arzıyla ve kendüden sonra vakf-ı merkūm mütevellîsinin ve sâir meşrûtün-lehüm arzlarıyla amel ve mustahıkkına tevcîh oluna ve vakf-ı mezbûr İslâmbol kādısı bulunan efendiler hazerâtı nezâretlerinde âsûde ola deyü ta‘yîn-i şurût eyledikden sonra yine vâkıfe-i mezbûre Zeyneb Hatun hayatında zevci ve tarafından sâbitü’l-vekâle vekîli mezbûr Sıdkı Ali Efendi b. Osman bin yüz yetmiş yedi senesi Cumâdelûlânın beşinci günü işbu mahkeme-i mezbûrede hilâfet-i mütevellî bulunan es-Seyyid Yahya Tevfik Efendi huzûrunda vakf-ı âti’z-zikre li-ecli’t-tescîl ben mütevellî nasb ve ta‘yîn olunup bi’l-vekâle benim muvâcehemde ikrâr-ı sahîh-i şer‘î ve i‘tirâf-ı sarîh-i mer‘î edip vâkıfe-i mezbûre Zeyneb Hatun yedinde mülk ve hakkı olup sâlifü’z-zikr Gedikpaşa kurbünde Emin Sinan mahallesinde vâki‘ iki tarafdan hâriciye ta‘bîr olunur vâkıfe-i mezbûrenin zevci vekîl-i mezbûr Sıdkı Ali Efendi menzili ve bir tarafdan tarîk-i hâs ve bir tarafdan tarîk-i âm ile mahdûd fevkānî üç bâb oda ve bir sofa ve tahtânî üç bâb oda ve kenîf ve kilâr ve matbah ve hamam ve câmekân odası ve iki bi’r-i mâ ve bağçeyi müştemil dâhiliye ta‘bîr olunur menzilin zikr olunan matbah tarafından vâki‘ terbî‘an yüz kırk sekiz zirâ‘ arsasının gallesi zikr olunan Emin Sinan mahallesi imâm ve müezzinine meşrûta senede dört yüz seksen akçe mukāta‘a-i kadîme ile mâ‘adâ arsa ve bi’l-cümle ebniyesi yedinde mülkü olmağla vâkıfe-i mezbûre Zeyneb Hatun sâlifü’z-zikr dâhiliye ta‘bîr olunur menzilini dahi hasbeten lillâh vakf ve habs ve vakf-ı sâlifü’l-beyânına zam ve ilhâk edip şöyle şart [eyledi] menzil-i mezkûr hayatda oldukça yevmî bir akçe icâre-i müeccele ile kendi mutasarrıfe olup icâre-i mezkûre vakf-ı sâlifü’l-beyânı mesârifine sarf olunan ve vakfiye-i sâbıkāsı derûnunda muharrer bi’l-cümle şurût ve kuyûd menzil-i mezkûrda dahi cârî olup şurût-ı mukarreresi mûcebiyle amel oluna deyü ta‘yîn-i şurût ve tebyîn-i kuyûd birle menzil-i mezkûru fâriğân ani’ş-şevâgil bana teslîm [68a] ben dahi tesellüm ve kabz ve sâir mütevellîler evkāfda tasarrufları gibi ba‘de’t-tasarruf vekîl-i mezbûr Sıdkı Ali Efendi vakf-ı akār İmâm-ı a‘zam hazretleri katında sahîh lâkin gayr-ı lâzım ve rücû‘u meşrû‘dur deyü menzil-i mezkûru vâkıfe-i mezbûrenin ke’l-evvel mülküne istirdâd murâd ve ben dahi fâzıl-ı samedânî Ebû Yusuf eş-şehîr bi’l-imâmi’s-sânî hazretleri katında vâkıf mücerred vakaftü demekle ve imâm Muhammed b. Hasan eş-Şeybânî hazretleri katında mütevellîye teslîm olunmağla vakıf sahîh ve lâzım olup rücû‘u gayr-ı meşrû‘dur deyü redden imtinâ‘ ve hâkim-i mûmâ-ileyh hazretleri huzûrunda müterâfi‘ân ve fasl ü hasma tâlibân olup hâkim-i mûmâ-ileyh dahi re’y-i imâmeyn-i mûmâ-ileyhimâ üzere vakf-ı mezbûrun sıhhat ve lüzûmuna hükm-i sahîh-i şer‘î edip vakf-ı mezbûr sahîh ve lâzım olduğunu müş‘ir kıbel-i şer‘den mümzâ ve mahtûm müvekkile-i mezbûre yedine bir kıt‘a vakfiye ma‘mûlün-bihâ dahi i‘tâ olunmuş idi. Lâkin vakfiye-i merkūme zâyi‘ olup ve mukayyed olan sicill-i mahfûzu dahi bundan akdem vukū‘ bulan harîk-i kebîr-i gālibde bi’l-külliye muhterik olmağla takrîrim zabt ve tahrîr ve husûs-ı mezkûra vukūf-ı tammı olan bî-garaz Müslimînden hakīkat-i hâl suâl ve istihbâr ve haberleri hüccet olunmak bi’t-tevliye matlûbumdur dedikde fi’l-hakīka hâl bi’l-cümle mukırr-ı mütevellî-i mezbûr Ali Ağa’nın bâlâda bast ü beyân ve şerh ü ayân eylediği minvâl üzere olduğunu sâlifü’z-zikr Koca Mustafa Paşa mahallesi ahâlisinden Ali Efendi b. Mehmed ve İsmail Ağa b. Halil ve Derviş Mehmed b. Hasan ve Ebûbekir Ağa b. Mehmed ve Davudpaşa mahallesi ahâlisinden Molla Ali b. Halil ve Salih b. Halil nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl mâ-vaka‘a bi’t-taleb ketb olundu. Fî 24 min-Ca sene 1197 Şühûdü’l-hâl: Ali Efendi b. Halil, Yusuf Efendi b. Mehmed, Mehmed Efendi b. Mehmed, el-Hâc İsmail Ağa berber, Hafız Halil Efendi b. Halil, Halil Beşe b. ( ), Mustafa Beşe b. ( ), Mustafa b. Mustafa, Molla Mehmed b. Mustafa, diğer Ali Efendi b. Mehmed, Salih b. Halil, İsmail Ağa b. Halil, Derviş Mehmed b. Hasan, Ebûbekir Ağa b. Mehmed, Molla Ali b. Halil, el-Hâc Hasan b. Osman ve gayruhum.