Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 244 Hüküm no: 199 Orijinal metin no: [55a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Hüsameddin Efendi’nin Hafız Ahmed Paşa Vakfı’ndan kiracısı olduğu bostanın kira sözleşmesinin davası Ma‘rûz, Sâhibe-i arzuhâl mu‘arrefetü’z-zât Kamer Hanım bt. Derviş Mustafa bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi hâzır olduğu hâlde Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde zikri âtî bir bâb bostan gediğine vaz‘-ı yedi mütehakkık olan derûn-ı arzuhâlde mezkûrü’l-ism Hâcegân-ı Dîvân-ı hümâyûn’dan el-Hâc Hüseyin Hüsameddin Efendi b. Mustafa tarafından husûs-ı âti’l-beyânda vekîl-i müseccel-i şer‘îsi Yusuf Efendi b. Osman muvâcehesinde medîne-i Üsküdar’a tâbi‘ Kādı karyesi hudûdu dâhilinde vâki‘ çayır ve bostan ve dere ile mahdûd bir bâb bostan ashâb-ı hayrâtdan merhûm Hafız Ahmed Paşa Vakfı musakkafâtından olarak senevî yedi yüz elli akçe icâre-i müeccele ile bâ-temessük-i mütevelli müstakılleten taht-ı tasarrufunda olup ancak müvekkil-i mûmâ-ileyh el-Hâc Hüseyin Hüsameddin Efendi bostan-ı mezkûrede Rûz-ı Kāsım i‘tibârıyla senevî yüz yirmi beşer guruş kirâ tesmiyesiyle müstecirim olmağla işbu sene-i mübârekede duhûl edecek Rûz-ı Kāsımı’ndan fesh-i icâre etmemle bostan-ı mezkûru târîh-i mezkûrda tahliye ve bana teslîme müvekkil-i mûmâ-ileyhe izâfetle vekîl-i merkūm Yusuf Efendi’ye tenbîh olunmak murâdımdır deyü da‘vâ etdikde vekîl-i mezbûr dahi cevâbında cânib-i Hazîne-i celîle-i Evkāf-ı hümâyûn’da mahfûz işbu müte‘addid hücecât-ı şer‘iyye mantûklarınca bostan-ı mezkûr derûnunda mevcûd beyne’l-isnâf gedik ta‘bîr olunur âlât-ı lâzıme-i ma‘lûme ve eşcâr-ı mağrûse-i mütenevvi‘a tedâvül-i eyâdî ile müvekkilim mûmâ-ileyhin mülkü olduğu hâlde bundan akdem bâ-irâde-i seniyye gedikât hakkında verilen nizâm-ı müstahsene mûcebince gedik-i mezkûru cânib-i evkāf-ı müşârün-ileyhe terk ve teberru‘ birle işbu sene-i mübâreke Saferi’l-hayrının altıncı günü târîhiyle müverrah cânib-i evkāf-ı müşârün-ileyhden bir kıt‘a gedik senedi ahzedip ol vechile gedik-i mezkûr ber-mûceb-i şurût-ı evkāf müvekkilim mûmâ-ileyhin tasarrufunda olmağla bostan-ı mezkûru tahliye ve teslîmden bi’l-vekâle imtinâ‘ ederim deyüp mazmûnları vekîl-i mezbûrun takrîr-i meşrûhuna mutâbık müte‘addid senedât ibrâz eylediğinde merkūme Kamer Hanım dahi senedât-ı mezkûrenin mazmûnlarını bi-tamâmihî tasdîk ve i‘tirâf eylediğinden mâ‘adâ bu makūle ber-mûceb-i şürût-ı nizâm-ı müstahsene vaz‘ olunan gedikât mutasarrıfları gediklerinin mevzû‘ olduğu mahâllin emlâk ashâbına kirâ-i kadîmelerin bilâ-ezâ ve lâ-cefâ edâ edegeldikleri takdîrce bahâne-i sâire ile ihrâçlarına tasaddî olunmamak nizâm ve şürûtundan ve bu makūle da‘vânın istimâ‘ından hükkâm-ı kirâm memnû‘lar idüğü huzûr-ı [âlîlerine i‘lâm olundu]. Fî 4 R sene [12]57.