Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 422 Hüküm no: 468 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun Vakfı’na Uzun Şüca mahallesinde bir evin vakfedildiğini gösteren vakfiye yangında yandığından evin vakfa ait olduğuna dair şahitler olduğu Kezâlik istihbâr-ı vakfiye-i evveli mukaddem olunan vakfiyenin aynıdır tâ âsûde ola deyü ta‘yîn-i şurût gelince Kezâlik ta‘yîn-i şurût eyledikden sonra vâkıfe-i mezbûre Zeyneb Hatun yine hayatında zevci mezbûr Sıdkı Ali Efendi b. Osman bin yüz yetmiş yedi senesi Cemâziyelevvel’inin beşinci günü işbu mahkeme-i merkūmede hilâfeten müvellâ bulunan es-Seyyid Yahya Tevfik Efendi huzûrunda vakf-ı âti’z-zikre li-ecli’t-tescîl ben mütevellî nasb ü ta‘yîn olunup benim muvâcehemde ikrâr-ı sahîh-i şer‘î ve i‘tirâf-ı sarîh-i mer‘î edip mezbûr Sıdkı Ali Efendi yedinde mülk ve hakkı olup sâlifü’z-zikr Gedik Paşa kurbünde Uzun Şücâ‘ mahallesinde vâki‘ bir tarafdan zevcesi mezbûre Zeyneb Hatun’un dâhiliye ta‘bîr olunur kendi vakfı olan menzil ve bir tarafdan Anber Mustafa Ağa menzili ve bir tarafdan Tatar Mahmud menzili ve bir tarafdan tarîk-i âm ile mahdûd fevkānî iki bâb oda ve sofa ve kenîf ve tahtânî iki bâb oda ve sofa ve kuş odası ve kenîf ve ahur ve mahzen ve bi’r-i mâ ve bağçeyi müştemil hâriciye ta‘bîr olunur menzilini hasbeten lillâh vakf ve habs ve zevcesi vâkıfe-i mezbûre Zeyneb Hatun’un vakf-ı sâlifü’l-beyânına zam ve ilhâk edip şöyle şart ve ta‘yîn eyledi ki, menzil-i mezkûr hayatında oldukça yevmî bir akçe icâre-i müeccele kendi mutasarrıf olup icâre-i mezkûre zevcesi vâkıfe-i mezbûrenin vakf-ı sâlifü’l-beyânı mesârifine sarf oluna ve vâkıfe-i mezbûrenin vakfiye-i sâbıkāsı derûnunda muharrer bi’l-cümle şurût ve kuyûd menzil-i mezkûrda dahi cârî olup şurût-ı mukarreresi mûcebiyle amel oluna deyü ta‘yîn-i şurût ve tebyîn-i kuyûd birle menzil-i mezkûru fâriğân ani’ş-şevâgil bana teslîm ben dahi tesellüm ve kabz ve sâir mütevellîler evkāfda tasarrufları gibi ba‘de’t-tasarruf vâkıf-ı mezbûr Sıdkı Ali Efendi vakf-ı akār İmâm-ı a‘zam hazretleri katında sahîh lâkin gayr-ı lâzım ve rücû‘u meşrû‘dur deyü menzil-i mezkûru ke’l-evvel mülküne istirdâd murâd ve ben dahi fâzıl-ı samedânî Ebû Yusuf eş-şehîr bi’l-imâmi’s-sânî hazretleri katında vâkıf mücerred vakaftü demekle ve İmâm Muhammed b. Hasan eş-Şeybânî hazretleri katında mütevellîye teslîm vakıf sahîh ve lâzım olup rücû‘u gayr-ı meşrû‘dur deyü redden imtinâ‘ ve hâkim-i mûmâ-ileyh hazretleri huzûrunda müterâfi‘ân ve fasl ü hasma tâlibân olup hâkim-i mûmâ-ileyh dahi re’y-i imâmeyn-i mûmâ-ileyhimâ vakf-ı mezbûrun sıhhat ve lüzûmuna hükm-i sahîh-i şer‘î edip vakf-ı mezbûr sahîh ve lâzım olduğunu müş‘ir kıbel-i şer‘den mümzâ ve mahtûm vâkıf-ı mezbûr Sıdkı Ali Efendi yedine bir kıt‘a vakfiye-i ma‘mûlün-bihâ dahi i‘tâ olunmuş idi. Lâkin vakfiye-i merkūme zâyi‘ ve mukayyed olan sicill-i mahfûzu dahi bundan akdem vukū‘ bulan harîk-i kebîr-i gālibde bi’l-külliye muhterik olmağla takrîrim zabt ve tahrîr ve husûs-ı mezkûra vukūf-ı tammı olan bî-garaz Müslimîn’den hakīkat-i hâl suâl ve istihbâr ve haberleri hüccet olunmak bi’t-tevliye matlûbumdur dedikde fi’l-hakīka hâl bi’l-cümle mukırr-ı mütevellî-i mezbûr Ali Ağa’nın bâlâda bast ü beyân ve şerh ü ayân eylediği minvâl üzere olduğunu mârrü’z-zikr Koca Mustafa Paşa mahallesi ahâlisinden Ali Efendi b. Mehmed ve İsmail Ağa b. Halil ve Derviş Mehmed b. Hasan ve Ebûbekir Ağa b. Mehmed ve Davudpaşa mahallesi ahâlisinden Molla Ali b. Halil ve Salih b. Halil nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 24 min-Cumâdelûlâ sene 1197 Eş-şâhidûnü’s-sâbıkūn ve gayruhum.