Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 424 Hüküm no: 469 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Şerife Emetullah Hatun’un evini Mehmed Haşim Ağa’ya sattığı Menzil mübâya‘ası Mahmiye-i İslâmbol’da Arabacı Bâyezid mahallesinde sâkine Şerife Emetullah Hatun bt. Mustafa tarafından husûs-ı âti’l-beyânı ikrâra vekîl olduğu Süleyman Ağa b. Ali ve Mustafa Ağa b. Ali nâm kimesneler şehâdetleriyle şer‘an sâbit olan eş-Şeyh İbrahim Efendi b. Hüseyin Efendi meclis-i şer‘-i şerîf-i enverde müvekkile-i mezbûrenin sadrî kebîr oğlu işbu bâ‘isü’l-kitâb es-Seyyid Mehmed Haşim Ağa b. Süleyman Efendi mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Şerife Emetullah Hatun’un irsen yedinde mülk ve hakkı olup mahalle-i mezbûrede vâki‘ bir tarafdan Mustafa Efendi menzili ve bir tarafdan Osman Çavuş menzili ve bir tarafdan Saliha Hatun menzili ve bir tarafdan tarîk-i âm ile mahdûd ve terbî‘an dokuz yüz zirâ‘ arsa üzerinde mebnî tahtânî iki bâb oda ve bir sofa ve iki matbah ve iki kenîf ve bir bi’r-i mâ ve bir mikdâr bağçeyi müştemil bir bâb harâb mülk menzilini cümle tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile oğlu mezbûr es-Seyyid Mehmed Haşim Ağa’ya yüz yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruşu müvekkilem mezbûre Şerife Emetullah Hatun oğlu mezbûr es-Seyyid Mehmed Haşim Ağa yedinden tamamen ahz ü kabz eyledi, ba‘de’l-yevm menzil-i mahdûd-ı mezkûr cemî‘ müştemilâtıyla oğlu mezbûr es-Seyyid Mehmed Haşim Ağa’nın mülk-i müşterâsı ve hakk-ı sarfı olup müvekkilem mezbûre Şerife Emetullah Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî-gurreti Cumâdelâhire sene 1197 Şühûdü’l-hâl: Es-Seyyid Hasan Ağa b. Mustafa, Mehmed Ağa b. Hüseyin, Abdullah Efendi b. Mehmed, Mustafa Efendi b. ( ), Mazlum es-Seyyid Ahmed, Süleyman Ağa b. Ali, Mustafa Ağa b. Ali, Molla Ali b. Halil.