Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 428 Hüküm no: 475 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Emine bt. Mustafa’nın bazı eşyalarını Saime Hatun’a sattığı Eşyâ mübâya‘ası Mahmiye-i İslâmbol’da Topkapısı dâhilinde Kürkçübaşı mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Emine bt. Mustafa nâm hatun meclis-i şer‘-i şerîf-i enverde işbu bâ‘isetü’l-kitâb Saime Hatun bt. Mehmed’in li-ebeveyn hemşîresi ve tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan kezâlik mu‘arrefetü’z-zât Âbide Hatun mahzarında ikrâr ve takrîr-i kelâm edip ben müvekkile-i mezbûrenin mahalle-i mezbûrede vâki‘ menzilinde sâkine olmamla yedimde mâlım ve mülküm olan ancak bir köhne alaca entari ve bir keremsûd hırka ve bir yaşmak ma‘a makrame ve bir çuka ferâcemi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Saime Hatun’a yirmi guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruşu müvekkile-i mezbûre Saime Hatun yedinden tamamen ahz ü kabz eyledim, ba‘de’l-yevm eşyâ-i muharrere-i mezkûre müvekkile-i mezbûre Saime Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 2 C sene 1197 Şühûdü’l-hâl: İmâm vekîli Mustafa Efendi b. Hüseyin, es-Seyyid Emin b. es-Seyyid Ali, Yakub b. Ömer, Mehmed b. İbrahim, İsmail b. Abdülhamid, Abdülhalim, Molla Ali b. Halil.