Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 428 Hüküm no: 476 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinde vefat eden Rukiye Hatun’un vârislerinden Rabia Hatun’un mirastaki hakkını alarak yine mirasçılardan Mehmed Ağa’nın zimmetini ibra ettiği Mîrâsdan ibrâ Mahmiye-i İslâmbol’da Uzun Yusuf mahallesinde sâkine iken bundan akdem vefât eden Rukiye Hatun bt. İsmail’in verâseti zevc-i metrûkü Mehmed Ağa b. Ali nâm kimesne ile vâlidesi Rabia bt. Hasan nâm hatuna münhasıra ve terekesinin nısfı zevci mezbûr Mehmed Ağa’ya ve nısf-ı âharı dahi farzan ve redden vâlidesi mezbûre Rabia Hatun’a isâbeti tahakkukundan sonra zâtı vech-i şer‘î üzere mu‘arrefe olan mezbûre Rabia Hatun meclis-i şer‘-i şerîf-i enverde dâmâdı işbu bâ‘isü’l-kitâb mezbûr Mehmed Ağa mahzarında bi’l-verâse ikrâr ve takrîr-i kelâm edip kızım mûrise-i müteveffât-ı mezbûrenin menkūl terekesi olmayıp zevci dâmâdı mezbûr Mehmed Ağa zimmetinde ma‘kūdun-aleyh olan yüz guruş mehr-i müeccelden benim nısf hisse-i irsiyeme isâbet eden elli guruşu bana def‘ ü teslîm eyledikde ben dahi yedinden tamamen ahz ü kabz ve istifâ-yı hak edip kızım mûrisem müteveffât-ı mezbûrenin cüz’î ve küllî terekesine ve hukūk-ı mîrâsa ve sâire müte‘allika âmme-i de‘âvî ve kâffe-i mutâlebâtdan ben mezbûr Mehmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı mîrâsa ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 3 C [sene 1197] Şühûdü’l-hâl: Es-Seyyid Mehmed b. Ebîbekir, Kuzâtdan Ali Efendi, İbrahim Efendi, el-Hâc Mehmed Ağa b. Abdullah, Kethudâ Ali Ağa b. Mehmed, Hilâlî el-Hâc Mehmed Ağa, Molla Ali b. Halil ve gayruhum.