Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 429 Hüküm no: 477 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezid Ağa mahallesinden Hadice bt. Hasan’ın evini Havva bt. Mehmed’e sattığı Menzil mübâya‘ası Mahmiye-i İslâmbol’da Topkapısı dâhilinde Bâyezid Ağa mahallesinde sâkine ve zâtı vech-i şer‘î üzere mu‘arrefe olan Hadice bt. el-Hâc Hasan meclis-i şer‘-i şerîf-i enverde kezâlik mu‘arrefetü’z-zât işbu bâ‘isetü’l-kitâb Havva bt. Mehmed mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Mustafa ve ba‘zan Canbaz Mehmed menzili ve bir tarafdan vakıf odalar ve bir tarafdan Artiyon zimmî veresesi menzili ve bir tarafdan tarîk-i âm ile mahdûd fevkānî iki bâb oda ve bir sofa ve dehliz ve tahtında kömürlük ve kenîf ve bi’r-i mâ ve bir mikdâr bağçe ve havluyu müştemil bir bâb mülk menzilimi cümle-i tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Havva’ya üç yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellüs ve tesellüm ve kabûl eyledikden sonra semeni olan meblağ-ı mezbûr üç yüz guruşu mezbûre Havva yedinden tamamen ahz ü kabz eyledim ba‘de’l-yevm menzil-i mahdûd-ı mezkûr mezbûre Havva’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır keyfe mâ teşâ ve tehtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a. Fî 5 C sene 1197 Şühûdü’l-hâl: Mustafa b. Ali Beşe, Hasan b. Mustafa, Ömer b. el-Hâc Ahmed, Molla Ali b. Halil, el-Hâc Hasan b. Osman.