Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 245 Hüküm no: 200 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed İzzet Efendi’nin, Mustafa Ağa aleyhinde eşya ve hibe davasında bulunmaktan men olunması Ma‘rûz, Mübârek rikâb-ı kamer-tâb-ı hüsrevâneye takdîm olunan arzuhâlde mezkûrü’l-ism es-Seyyid Mehmed İzzet Efendi b. Abdullah nâm kimesne medîne-i Üsküdar’da ( ) mahallesinde meclis-i şer‘-i münîrde kezâlik derûn-ı arzuhâlde ismi mezkûr es-Seyyid Mustafa Ağa b. Ahmed nâm kimesne muvâcehesinde merkūm es-Seyyid Mustafa Ağa bin iki yüz elli altı senesi Cemâziyelûlâsı gurresinde medîne-i mezbûrede Gerede mahallesinde vâki‘ sâkin olduğu menzilinde mevcûde eşyâ-i memlûkesinden bir Piryol koyun sâ‘ati ve bir çift İngiliz piştovu ve bir kara Horasan kılıç ve iki kehribar çubuk takımını bana hibe ve temlîk ve yine eşyâ-i memlûkesinden yün memlû on minder ve otuz çit yasdık ve dokuz çit mak‘ad ve on Siroz [Serez] basması yorgan ma‘a çârşeb ve beş şilte ve altı döşek çârşebi ve iki çit döşek ve sekiz baş yasdığı ve sekiz yüz yasdığı ve iki orta kiçesi ve dört çuka kapı perdesi ve iki tahta anbar ve beş sepet sandık ve bir geziye kaplı nâfe boy kürkü ve bir binişe kaplı nâfe kürk ve bir çukaya nâfe kürk ve bir geziye kaplı kara kulak kürk ve yedi gömlek ve yedi don ve yedi uçkur ve bir Lahorî şal ve bir Ahmediye ve destâr ve sekiz köhne anteri ve bir çuka potur ve tombak tatlı çukası? ve beş koltuk yasdığı ve on tombak zarf ve on fincan ve on iki sahan ma‘a kapak ve iki leğen ve üç ibrik ve yedi sagīr ve kebîr tencere ma‘a kapak ve bir vasat kazgan ma‘a kapak ve iki sini ve iki kadayıf tepsisi ve bir kuzu tenceresi ve üç şorba tası ma‘a kapak ve üç sagīr kebîr lenger ve bir kefkir ve bir süzgü ve bir kefçe ve bir kahve değirmeni ve bir kahve tepsisi ve bir şamdan tepsi ve otuz kaşık ve bir musluklu güğüm ve diğer bir güğüm, bir kebîr tâbe ve bir sagīr tâbe ve kebîr on duhân tablası ve bir nühâs mangal ve beş şamdan dahi bi-safkatin vâhidetin iki bin guruşa bana bey‘ ve temlîk ve her birini teslîm eylediğinde ben dahi ber-vech-i muharrer iştirâ ve intihâb ve temellük ve tesellüm ve kabûl edip semeni olan meblağ-ı merkūm iki bin guruş mutâlebesine müte‘allika da‘vâdan benim zimmetimi kabûlü hâvî ibrâ ve iskāt eylediğinden sonra biz sene-i mezkûre Zilhiccetü’ş-şerîfesi’nin yirmi sekizinci günü mezbûr ile beynimizde olan hibe ve bey‘-i mezkûru bi’r-rızâ fesh ü ikāle ve eşyâ-i mezkûreyi mezbûr es-Seyyid Mustafa Ağa’ya teslîm ve fîmâ-ba‘d eşyâ-i mezbûrede kat‘an alâkam olmayıp husûs-ı mezkûre ve hukūk-ı sâire-i şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmiş idik. El-hâletü hâzihî mezbûr es-Seyyid Mustafa Ağa ihtiyâr olduğundan eşyâ-i mezkûreyi ber-vech-i muharrer bey‘ ve hibe eylediği esnâda kendüyü ölünceye değin görüp gösetmek şartıyla bana bey‘ ve hibe edip lâkin eşyâ-i mezkûreyi mezbûre ikāle ile gerüye redd ü teslîm ve ibrâ-i mezkûreme nâdim ve pişmân olmamla yine şart-ı mezkûre ile eşyâ-i mezkûreyi tekrâr bana bey‘ ve hibe etmek üzere merkūm es-Seyyid Mustafa Ağa’ya cebr olunsun deyü takrîr-i meşrûhu üzere îrâd eylediği kelâmı şer‘an müvecceh ve mültefet olmamağla mûcebince merkūm es-Seyyid Mehmed İzzet Efendi da‘vâ-yı mezkûresiyle mezbûr es-Seyyid Mustafa Ağa’ya [56a] bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. Fî 8 Ra sene [12[57.