Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 430 Hüküm no: 478 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atik Ali Paşa mahallesinden Ümmüseleme bt. Ahmed’in Süleyman b. Mehmed ile boşanması Muhâla‘a Mahmiye-i İslâmbol’da Atik Ali Paşa mahallesinde sâkine ve zâtı vech-i şer‘î üzere mu‘arrefe olan Ümmüseleme bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Süleyman b. Mehmed nâm kimesne mahzarında ikrâr ve takrîr-i kelâm edip mezbûr Süleyman zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Süleyman ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 5 min-C sene 1197 Şühûdü’l-hâl: Kapıcı Ali b. ( ), Molla Ali b. Halil, Salih b. Halil, Molla Mehmed b. Mustafa, Hacı Safer b. Osman.