Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 430 Hüküm no: 479 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Emine Hatun’un bir kısım eşyasını kocasına sattığı Eşyâ mübâya‘ası Mahmiye-i İslâmbol’da Uzun Yusuf mahallesinde sâkine Emine Hatun bt. Osman Çavuş tarafından husûs-ı âti’l-beyânı ikrâra vekîl olduğu zâtını ârifân Müezzin Molla Halil b. Mustafa ve Salih Çavuş b. Abdullah nâm kimesneler şehâdetleriyle şer‘an sâbit olan Mehmed Said Ağa b. Ali nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb Ali Çavuş Ağa b. Abdullah nâm kimesne mahzarında ikrâr ve takrîr-i kelâm edip müvekkilem mezbûre Emine Hatun eşyâ-i memlûkesinden yün memlû on iki kadife yasdık ve altı minder ve iki döşek ma‘a şilte yemeni ve kumaş altı yorgan ma‘a çârşeb ve iki baş yasdığı ve üç yemeni mak‘ad ve dört çârşeb ve bir orta keçesi ve iki kilim ve altı tencere bâ-kapak ve yirmi sahan bâ-kapak ve üç lenger ve bir tâbe sagīr ve kebîr üç sini ve bir kazgan ve üç tas ve bir bakraç ve iki leğen ma‘a ibrik ve iki âbdest leğeni ve iki mankāl ve altı tepsi ve bir şerbet ibriği ve dört kahve ibriği tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Ali Çavuş Ağa’ya iki yüz yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz yirmi guruş mutâlebesinden müvekkilem mezbûre Emine Hatun zevci mezbûrun zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûr Ali Çavuş Ağa’nın mülk-i müşterâsı ve hakk-ı sarfı olup müvekkilem mezbûre Emine Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î. Fî 5 C sene 1197 Şühûdü’l-hâl: Es-Seyyid el-Hâc Zeynelabidin Efendi b. es-Seyyid eş-Şeyh Halil Efendi, Ali Efendi b. Mehmed, Müezzin Molla Mehmed b. Ebîbekir, Müezzin Molla Halil b. Mustafa, Salih Çavuş b. Abdullah, Hüseyin Ağa b. el-Hâc İbrahim, Ahmed Odabaşı b. İsmail, Molla Ali b. Halil, el-Hâc Hasan b. Osman.