Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 434 Hüküm no: 485 Orijinal metin no: [70a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Abdullah’ın Balaban Ağa mahallesindeki ev arsasını kocasına sattığı < Mahmiye-i İslâmbol’da Uzun Yusuf mahallesinde sâkine Saliha bt. Abdullah nâm hatun tarafından husûs-ı âti’l-beyânı ikrâra vekîl olduğu zâtını ârifân es-Seyyid Veliyüddin b. Hasan ve el-Hâc Hasan b. Osman nâm kimesne şehâdetleriyle şer‘an sâbit olan el-Hâc Ali b. İbrahim nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb es-Seyyid Osman b. es-Seyyid Ali nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Saliha Hatun’un bâ-hüccet-i şer‘iye irsen ve şirâen yedinde mülk ve hakkı olup mahmiye-i mezbûrede Balaban Ağa mahallesinde vâki‘ bir tarafdan südcü kârhânesi ve bir tarafdan paçacı dükkânı ve bir tarafdan yeniçeri odaları cidârı ve bir tarafdan tarîk-i âm ile mahdûd bir bi’r-i mâyı müştemil bir bâb mülk menzil arsasını târih-i kitâbdan beş ay mukaddem tarafeynden îcâb ve kabûlü hâvî bey‘-i bâtt-ı sahîh-i şer‘î ile zevci mezbûr es-Seyyid Osman’a elli guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr elli guruş mutâlebesinden müvekkilem mezbûre Saliha Hatun zevci mezbûr es-Seyyid Osman’ın zimmetini ibrâ ve ıskāt eylediğinde ol dahi ibrâsını kabûl etmeğin ol-vechile arsa-i mahdûde-i mezkûra târih-i mezbûrdan beri zevci mezbûr es-Seyyid Osman’ın mülk-i müşterâsı ve hakk-ı sarfı olup müvekkilem mezbûre Saliha Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 7 min-C sene 1197 Şühûdü’l-hâl: Es-Seyyid Mehmed b. Ahmed, Molla Ali b. Halil, Hüseyin Ağa b. el-Hâc Ali, es-Seyyid Veliyüddin b. Hasan, Salih b. Halil ve gayruhum.>>