Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 435 Hüküm no: 486 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi, Mustafa Efendi, Mehmed Efendi ve Fatma Hatun’un Koruk Mahmud mahallesindeki yanmış ev arsasının kendilerine ait hisselerini İbrahim Efendi’ye sattıkları Arsadan hisse mübâya‘ası Mahmiye-i İslâmbol’da Koruk Mahmud mahallesinde vâki‘ bir tarafdan Halil Çavuş’un menzil arsası ve ba‘zan Fatıma Hatun’un menzil arsası ve bir tarafdan el-Hâc İbrahim Efendi’nin menzil arsası ve iki tarafdan tarîk-i âm ile mahdûd derûnunda bir hamam ve bir kârgîr su hazînesi ve altı çuvaldız mâ-i lezîz-i cârî ve sâir enkāz-ı mevcûde-i ma‘lûmeyi muhtevî terbî‘an bin yedi yüz zirâ‘ bir bâb muhterik mülk menzil arsasının altmış sehm i‘tibârıyla otuz sehmi mûmâ-ileyh el-Hâc İbrahim Efendi b. el-Hâc Ramazan’ın bâ-hüccet-i şer‘iye irsen ve şirâen ve on ikişer sehmden cem‘an yirmi dört sehmi sulbî kebîr oğulları Mustafa Efendi ve Mehmed Efendi’nin ve altı sehmi sulbiye kebîre kızı Fatıma Hatun’un irsen bâ-hüccet-i şer‘iye yedlerinde mülk ve hakları olduğu lede’ş-şer‘i’l-enver zâhir oldukdan sonra mezbûrân Mustafa Efendi ve Mehmed Said Efendi asâleten ve mezbûre Fatıma Hatun tarafından husûs-ı âti’l-beyânda vekîl olduğu zât-ı mezbûreyi ârifân İbrahim Çavuş Ağa b. İbrahim ve Ali Çavuş Ağa b. Mustafa şehâdetleriyle şer‘an sâbit olan li-ebeveyn er karındaşı mezbûr Mustafa Efendi vekâleten meclis-i şer‘-i hatîr-i lâzımü’t-tevkīrde Silahdâr kalemi hulefâlarından umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam bâ‘isü hâze’l-kitâbi’l-müstetâb pederleri mûmâ-ileyh el-Hâc İbrahim Efendi tarafından husûs-ı âti’l-beyânda vekîl olduğu nehc-i şer‘î ve tarîk-i mer‘î üzere sâbit olan Osman Çavuş Ağa b. Mehmed mahzarında her biri bi’l-asâle ve bi’l-vekâle ikrâr ve takrîr-i kelâm edip bâlâda tahdîd ve tavsîf olunan arsa-i mezkûre derûnunda zikr olunan hazîneye cârî mârrü’l-beyân altı çuvaldız mâ-i lezîzden mezbûr Mustafa Efendi i‘tibâr-ı mezkûr üzere mâlik olduğu on iki sehm mâ-i lezîz hissesini yedinde ba‘de’l-ibkā mezbûrân Mustafa Efendi ve Mehmed Said Efendi arsa-i mahdûde-i mezkûrede ber-i‘tibâr-ı mezkûr mâlikler oldukları yirmi dört sehm hisse-i şâyi‘alarını ikişer yüz elli beşer guruşa ve müvekkile-i mezbûre Fatıma Hatun’un ber-minvâl-i muharrer mâlike olduğu altı sehm hisse-i irsiye-i şâyi‘asını yüz yirmi yedi buçuk guruşa ki cem‘an altı yüz otuz yedi buçuk guruşa tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile pederleri müvekkil-i mûmâ-ileyh el-Hâc İbrahim Efendi’ye bi’l-asâle ve bi’l-vekâle bey‘ ve temlik ve teslîm eylediklerinde mezbûr Osman Çavuş Ağa dahi bi’l-vekâle iştirâ ve temellük ve tesellüm ve kabûl eyledikden sonra semeni olan meblağ-ı mecmû‘-ı mezkûr altı yüz otuz yedi buçuk guruşu pederimiz müvekkil-i mûmâ-ileyh el-Hâc İbrahim Efendi yedinden bi’l-asâle ve bi’l-vekâle bi-kadri’l-hısas tamamen ahz ü kabz eyledik, ba‘de’l-yevm mârrü’l-beyân altı çuvaldız mâ-i lezîzin i‘tibâr-ı mezkûr üzere on iki sehmden mâ‘adâ arsa-i mahdûde-i mezkûre derûnunda mevcûd enkāz-ı ma‘lûme ve müştemilât-ı sâire ve bâkī kırk sekiz sehm mâ-i lezîz pederimiz müvekkil-i mûmâ-ileyh el-Hâc İbrahim Efendi’nin irsen ve şirâen müstakıllen mülk-i sahîh ve hakk-ı sarîhi olup bizim ve müvekkile-i mezbûre Fatıma Hatun’un kat‘a alâka ve medhalimiz kalmamışdır dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 4 min-C sene 1197 Şühûdü’l-hâl: Süleyman Efendi b. Ahmed, Hüseyin Çavuş Ağa b. el-Hâc Mehmed, Halil Çavuş Ağa b. Halil, Osman Çavuş Ağa b. Ali, Ali Çavuş Ağa b. Mustafa, İbrahim Çavuş Ağa b. İbrahim, Molla Ali b. Halil, Salih b. Halil, Hacı Hasan b. Osman.