Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 436 Hüküm no: 487 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Habib’in Koruk Mahmud mahallesinde vakfettiği çeşme vakfının tevliyetinin Mustafa Efendi’de olduğu İstihbâr-ı tevliyet-i vakf ber-vech-i meşrûta Ashâb-ı hayrâtdan sâbıkā Silahdâr ocağı kethudâsı merhûm Mustafa Ağa b. Habib nâm sâhibü’l-hayrın mahmiye-i İslâmbol’da Koruk Mahmud mahallesinde vâki‘ hayatında sâkin olduğu menzili duvarında tarîk-i âmda binâ ve ihyâ eylediği çeşme vakfının meşrûtiyet üzere hâlâ mütevellîsi ve mukābele-i süvârî kalemi kâtiblerinden bâ‘isü hâze’l-kitâbi’l-müstetâb Mustafa Efendi b. el-Hâc İbrahim Efendi meclis-i şer‘-i hatîr-i lâzımü’t-tevkīrde bi’t-tevliye takrîr-i kelâm ve ta‘bîr ani’l-merâm edip işbu yedimde olan bir kıt‘a vakfiye-i ma‘mûlün-bihâ nâtıka olduğu üzere min-kıbeli’l-üm vâkıf-ı merhûm mezbûr Mustafa Ağa sâlifü’z-zikr çeşme vakfının tevliyetine hayatda oldukça kendi mutasarrıf olup vefâtından sonra evlâdı ve evlâd-ı evlâdı ve evlâd-ı evlâd-ı evlâdının batnen ba‘de batnin ekber ve erşedi mutasarrıflar olalar, el-iyâzü billâhi ba‘de’l-inkırâz utekā ve atikātım ve onların evlâdı ve evlâd-ı evlâdı ve evlâd-ı evlâd-ı evlâdı kezâlik şart-ı mezkûr üzere mutasarrıflar olalar deyü ta‘yîn-i şurût ve tebyîn-i kuyûd eyledikden sonra ceddim vâkıf-ı merhûm mezbûr Mustafa Ağa tevliyet-i vakf-ı mezbûra ilâ-vefâtihî mutasarrıf ve ba‘de’l-vefât sulbiye kebîre kızı vâlidem Hacce Rukiye Hatun şart-ı mezkûr üzere vakf-ı mezbûra mütevelliye olup ol dahi tevliyet-i mezkûreye ilâ-vefâtihâ mutasarrıfe ve ba‘de’l-vefât nevbet-i tasarruf tevliyet-i vakf-ı mezbûr ber-mûceb-i şart-ı vâkıf bana intikāl etmekle takrîrim zabt ve takrîr ve husûs-ı mezkûra vukūf-ı tammı olan bî-garaz Müslimînden hakīkat-i hâl suâl ve istihbâr ve haberleri hüccet olunmak bi’t-tevliye matlûbumdur dedikde fi’l-hakīka hâl bi’l-cümle mukırr-ı mütevellî-i mûmâ-ileyh Mustafa Efendi’nin bâlâda bast ü beyân ve şerh ü ayân eylediği minvâl üzere olduğunu mârrü’l-beyân Koruk Mahmud mahallesi ahâlisinden Mehmed Said Efendi b. el-Hâc İbrahim ve Süleyman Efendi b. Ahmed ve Osman Çavuş Ağa b. Ali ve İbrahim Çavuş Ağa b. İbrahim ve Ali Çavuş Ağa b. Mustafa ve diğer Osman Çavuş Ağa b. Mehmed nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 4 min-C sene 1197 Eş-şühûdü’s-sâbıkūn.