Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 437 Hüküm no: 488 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin babasının Koruk Mahmud mahallesinde vakfettiği çeşmeye ilave olarak bir çuvaldız su vakfettiği Mâ-fîhi mine’l-vakfi ve’z-zammi mutâbıkun li’ş-şer‘i’l-mu‘azzam fe-hakemtü bi-sıhhatihî ve lüzûmihî fî-husûsihî ve umûmihî âlimen bi’l-hilâfi’l-cârî beyne’l-eimmeti’l-eslâf ve ene’l-fakīr ileyhi azze şânühû Bâli Fânizâde Şerif Mehmed Emin el-müvellâ hilâfeten bi-mahkemeti Davudpaşa bi-Dâri’l-hilâfeti’l-aliyyeti’l-mahmiye -gufira lehüm- Vakfiye-i mâ-i lezîz El-hamdülillâhi Rabbi’l-âlemîn ve’s-salâtü ve’s-selâmü alâ-hayri halkıhî Muhammedin ve âlihî ve sahbihî ecma‘în. Ammâ ba‘d işbu kitâb-ı sıhhat-nisâbın tahrîr ü imlâ ve tastîr ü inşâsına bâ‘is ü bâdî oldur ki, hâlâ mukābele-i süvârî kalemi kâtiblerinden olup mahmiye-i İslâmbol’da Koruk Mahmud mahallesinde sâkin sâhibü’l-hayrât ve’l-hasenât ve tâlibü’l-meberrât Mustafa Efendi b. el-Hâc İbrahim Efendi meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda vakf-ı âti’z-zikre li-ecli’t-tescîl ve’l-emri’l-itmâm [71a] ve’t-tekmîl mütevellî nasb ü ta‘yîn olunan İbrahim Çavuş Ağa b. İbrahim mahzarında ikrâr-ı sahîh-i şer‘î ve i‘tirâf-ı sarîh-i mer‘î edip pederim mûmâ-ileyh el-Hâc İbrahim Efendi b. el-Hâc Ramazan’ın bâ-hüccet-i şer‘iye irsen ve şirâen yedinde mülk ve hakkı olup mahalle-i mezbûrede vâki‘ ma‘lûmü’l-hudûd bir bâb muhterik mülk menzil arsası derûnunda kâin kârgîr su hazînesine kanavâtına teba‘iyet ile cârî altı çuvaldız mâ-i lezîzin her bir çuvaldızı onar sehmden i‘tibâr olunup mecmû‘u altmış sehm i‘tibârıyla kırk sekiz sehmi pederim mûmâ-ileyh el-Hâc İbrahim Efendi’nin kezâlik irsen ve şirâen ve on iki sehmi dahi irsen benim yedimde mülk ve hakkımız olmağın ben mârrü’z-zikr mâ-i lezîz-i mezbûrdan i‘tibâr-ı mezkûr üzere mâlik olduğum bir çuvaldız iki sehm hisse-i irsiyemi hasbeten lillâhi’l-ferdi’s-samed ve taleben li-merzâti’r-Rabbi’l-ahad vakf-ı sahîh-i muhalled ve habs-i sarîh-i müebbed ile vakf ve habsedip şöyle şart ve ta‘yîn eyledim ki, meşrûtiyet üzere hâlâ mütevellîsi olduğum ashâb-ı hayrâtdan min-kıbeli’l-üm ceddim sâbıkā Silahdâr Ocağı kethudâsı merhûm Mustafa b. Habib’in zikr olunan Koruk Mahmud mahallesinde arsa-i mezkûre duvarında tarîk-i âmda binâ ve ihyâ eylediği çeşme vakfına zam ve ilhâk eylediğimden sonra mârrü’l-beyân bir çuvaldız iki sehm mâ-i lezîz ceddim merhûm-ı mezbûrun çeşme-i mezkûruna icrâ ve çeşme-i mezbûrdan cemî‘ ibâdullâh şürb ve sikāyet üzere olalar deyü mâ-i lezîz-i mezbûru vakfiyet üzere mütevellî-i mezbûr İbrahim Çavuş Ağa’ya vech-i lâyıkı üzere teslîm ol dahi tesellüm ve sâir mütevellîler evkātında tasarrufları gibi mutasarrıf oldu dedikde mütevellî-i mezbûr dahi hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri huzûrunda vâkıf-ı mûmâ-ileyh Mustafa Efendi’yi cemî‘ kelimât-ı meşrûhasında vicâhen tasdîk ve şifâhen tahkīk etdikde hâkim-i mûmâ-ileyh dahi tarafeynin tesâduk-ı encâmlarını min-evvelihî ilâ-âhirihî istimâ‘ ve ısgā edicek sâlifü’z-zikr bir çuvaldız iki sehm mâ-i lezîz kâffe-i ibâdullâh içün müsellem ve mümtâz olmağın sıhhat-i vakf ve lüzûmuna alâ-kavli men-yerâhu mine’l-eimmeti’l-fuhûl hükm-i sahîh-i şer‘î etmeğin min-ba‘d vakf-ı mezbûr sahîh ve lâzım olup nakz ve tahvîline mecâl muhâl oldu, cerâ zâlik. Ve hurrire fî 4 min-Cumâdelâhire sene 1197 Şühûdü’l-hâl: Fahrü’l-kuzât es-Seyyid Mustafa Sadullah Efendi b. es-Seyyid el-Hâc Mehmed Said Efendi, fahrü’l-huffâz Numan Efendi b. Süleyman, fahrü’l-eimmeti Hüseyin Efendi b. el-Hâc İbrahim, el-Hâc İbrahim Efendi b. el-Hâc Ramazan, Mehmed Said Efendi b. el-Hâc İbrahim Efendi ve’ş-şâhidûnü’s-sâbıkūn ve gayruhum.