Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 438 Hüküm no: 489 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koca Mustafa Paşa mahallesinden Şerife Hadice Hatun’un bir kısım eşyasını Mustafa Ağa’ya sattığı Eşyâ mübâya‘ası Mahmiye-i İslâmbol’da Koca Mustafa Paşa mahallesinde sâkine Şerife Hadice Hatun bt. es-Seyyid Musa tarafından husûs-ı âti’l-beyânı ikrâra vekîl olduğu zâtını ârifân es-Seyyid Mehmed b. es-Seyyid Mesud ve Müezzin Molla Mehmed b. Ahmed şehâdetleriyle şer‘an sâbit olan Ahmed Ârif b. Mustafa nâm kimesne meclis-i şer‘-i şerîf-i enverde işbu bâ‘isü’l-kitâb el-Hâc Mustafa Ağa b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Şerife Hadice Hatun mahalle-i mezbûrede sâkine olduğu menzilde mevcûde yedinde mâlı ve mülkü ancak iki müsta‘mel baş yasdığı ve iki beylik ve iki döşek çârşebi ve bir Yanbolu kebesi ve bir yemeni yorgan ve bir mak‘ad ve üç değir[mi] yemeni ve iki çuka ferâce ve dört Şam alacası entari ve bir bez gömlek ve iki don ve bir bogasi hırka ve dört yaşmak ma‘a makrame ve bir sepet sandığına münhasıra olmağın müvekkilem mezbûre Şerife Hadice Hatun eşyâ-i muharrere-i mezkûreyi tarafeynden îcâb ve kabûlü [hâvî] bey‘-i bâtt-ı sahîh-i şer‘î ve safka-i vâhide ile mezbûr el-Hâc Mustafa Ağa’ya otuz guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden müvekkilem mezbûre Şerife Hadice Hatun mezbûr el-Hâc Mustafa Ağa’nın zimmetini ibrâ ve ıskāt eylediğinde ol dahi ibrâsını kabûl ba‘de’l-yevm eşyâ-i muharrere-i mezkûre mezbûr el-Hâc Mustafa Ağa’nın mülk-i müşterâsı ve hakk-ı sarfı olup müvekkilem mezbûre Şerife Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î bi’t-taleb. Fî 13 min-C sene 1197 Şühûdü’l-hâl: Es-Seyyid Osman b. es-Seyyid Abdullah, el-Hâc İbrahim b. Mustafa, es-Seyyid Mehmed b. es-Seyyid Mesud, Molla Mehmed b. Ahmed, Müezzin Molla Ali b. Halil.