Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 439 Hüküm no: 490 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinden Havva’nın vefat eden babası Ali ile sonra vefat eden kardeşi Salih’den kalan mirastan hakkını aldığı Terekeden ibrâ eskiden mazbatada kalmağla bu mahalle kayd olundu. Mahmiye-i İslâmbol’da İbrahim Çavuş mahallesinde sâkin bundan akdem vefât eden Ali b. Abdullah’ın verâseti zevce-i menkûha-i metrûkesi Âişe bt. Mehmed nâm hatun, sulbî oğlu Salih ve sulbiye sagīre kızı Havva’ya münhasıra ba‘dehû mezbûr Salih dahi vefât edip verâseti vâlidesi mezbûre Âişe Hatun ile li-ebeveyn kız karındaşı mezbûre Havva’ya münhasıra olduğu lede’ş-şer‘i’l-enver zâhir oldukdan sonra zâtı vech-i şer‘î üzere mu‘arrefe olan mezbûre Havva meclis-i şer‘-i hatîrde vâlidesi kezâlik zâtı mu‘arrefe olan işbu bâ‘isetü’l-kitâb mezbûre Âişe Hatun mahzarında ikrâr ve takrîr-i kelâm edip babam müteveffâ-yı evvel mezbûr Ali ile karındaşım müteveffâ-yı sânî mezbûrun hîn-i vefâtlarında yanlarında mevcûd terekelerinden hisse-i irsiye-i ma‘lûmemi ben sagīre olmamla vâlidem mezbûre Âişe Hatun bi’l-vesâye ahz ü kabz etmiş idi. El-hâletü hâzihî babam müteveffâ-yı evvel mezbûr ile karındaşım müteveffâ-yı sânî mezbûrun terekelerinden vâlidem mezbûre Âişe Hatun bi’l-vesâye ahz ü kabz eylediği hisse-i irsiyem mukābelesinde bana on kat câmeşûy ve bir beledî döşek ma‘a şilte ve bir yemeni baş yasdığı ve bir yüz yasdığı ve bir yorgan ve iki çârşeb ve üç sahan ma‘a kapak ve iki tencere bâ-kapak ve bir tepsi ve bir lenger ve on destmâl ve bir nişân yağlığı ve bir çevreyi def‘ ü teslîm eyledikde ben dahi bi-a‘yânihâ yedinden tamamen ahz ü kabz edip hukūk-ı mîrâsa müte‘allika âmme-i de‘âvî ve kâffe-i mutâlebâtdan vâlidem mezbûre Âişe Hatun ile üvey babam Ahmed Beşe b. Salih’den her birinin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a. Fî 19 min-Rebî‘ülâhir sene 1197 Şühûdü’l-hâl: el-Hâc Mehmed b. ( ), Kemhacı Osman Ağa, Molla Ali b. Halil, Salih b. Halil ve gayruhum.