Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 440 Hüküm no: 491 Orijinal metin no: [71b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman, Mehmed, Rabia ve Zeliha’nın Molla Ali’den alacakları ve diğer işleri için kardeşleri Selman b. İsmail’in vekil olduğu İsbât-ı vekâlet Vilâyet-i Rumeli’de Avlonya sancağında Iskarapar kazâsına tâbi‘ Rok karyesi ahâlisinden olup mahmiye-i İslâmbol’da Yedikule hâricinde müsâfiren sâkin ve ber-vech-i âtî vekâlet iddi‘â eden işbu bâ‘isü’l-kitâb Selman b. İsmail nâm kimesne meclis-i şer‘-i şerîf-i enverde Molla Ali b. Halil mahzarında üzerine da‘vâ ve takrîr-i kelâm edip benim ve karye-i mezbûrede sâkinler li-ebeveyn karındaşlarım Osman ve Mehmed ile kız karındaşlarım Rabia ve Zeliha’nın mezbûr Molla Ali zimmetinde cihet-i karzdan beş guruş alacak hakkımız olup meblağ-ı mezbûru mezbûr Molla Ali’den ve mârrü’z-zikr Yedikule hâricinde kâin taht-ı tasarrufumuzda olan ma‘lûmü’l-hudûd bir bâb vakıf mumhâne ile mahrûse-i Galata’da Kalora kapısı kurbünde kâin kezâlik ma‘lûmü’l-hudûd bir bâb vakıf mumhâne icârelerini müstecirleri olan ma‘lûmü’l-esâmî kimesnelerden taleb ve da‘vâ ve ahz ü kabza ve makbûzumdan hisselerini kendilere îsâl ve teslîme ve husûs-ı mezkûr mütevakkıf olduğu umûrun küllîsine beni taraflarından vekîl ve nâib-i menâb nasb ü ta‘yîn eylediklerinde ben dahi vekâlet-i mezbûreyi kabûl etmemle meblağ-ı mezbûru mezbûr Molla Ali’den bi’l-asâle ve bi’l-vekâle hâlâ taleb ederim, suâl olunsun dedikde gıbbe’s-suâl mezbûr Molla Ali dahi cevâbında müdde‘î-i mezbûr Selman ile müvekkilûn-ı mezbûrûna cihet-i mezkûreden zimmetinde beş guruş deyni olduğunu ikrâr lâkin vekâlet-i mezbûreyi inkâr edicek müdde‘î-i mezbûrdan ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden ve karye-i mezbûre ahâlisinden Zekeriya b. Süleyman ve Ahmed b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mezbûr Selman’ın li-ebeveyn er karındaşları ve karye-i mezbûrede sâkinler Osman ve Mehmed ile kız karındaşları zâtları ma‘lûmumuz olan Rabia ve Zeliha hatunlar işbu mezbûr Molla Ali zimmetinde cihet-i karzdan alacak hakları olan beş guruşdan hisselerini mezbûr Molla Ali’den ve mârrü’z-zikr Yedikule hâricinde taht-ı tasarruflarında olan ma‘lûmü’l-hudûd bir bâb vakıf mumhâne ile mahrûse-i Galata’da Kalora? kapısı kurbünde kâin kezâlik ma‘lûmü’l-hudûd bir bâb vakıf mumhâne icârelerini müstecirleri olan ma‘lûmü’l-esâmî kimesnelerden taleb ve da‘vâ ve ahz ü kabza ve makbûzundan hisselerini kendilere îsâl ve teslîme ve husûs-ı mezkûr mutavakkıf olduğu umûrun küllîsine taraflarından karındaşları Selman’ı vekîl ve nâib-i menâb nasb ü ta‘yîn eylediklerinde ol dahi vekâlet-i mezbûreyi kabûl eyledi, biz bu husûsa bu vech üzere şâhidleriz şehâdet dahi ederiz deyü her biri meclis-i şer‘de edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb. Fî 6 min-C sene 1197 Şühûdü’l-hâl: Ebûbekir Ağa b. Ömer yiğitbaşı, Molla Hüseyin b. Mehmed, Osman Ağa b. Ali, Mehmed Emin b. el-Hâc İbrahim, Mahmud Ağa b. Mehmed, Zekeriya b. Süleyman, Ahmed b. Abdullah, Küçük Ebûbekir Beşe b. İbrahim, Molla Ali b. Halil.