Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 441 Hüküm no: 492 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selman b. İsmail’in kendisi ve kardeşleri adına babalarından kalan mumhane icarlarını vekâleti sebebiyle aldığı Ahz ü kabz ve ibrâ Kezâlik müsâfiren sâkin Selman b. İsmail nâm kimesne kendi nefsinden asîl ve bir kıt‘a vekâlet hücceti nâtıka olduğu üzere karye-i mezbûrede sâkinler li-ebeveyn er karındaşları Osman ve Mehmed nâm kimesne ile li-ebeveyn kız karındaşları Rabia ve Zeliha hatunlar taraflarından vech-i âtî üzere vekîlleri olduğu zât-ı mezbûretânı ârifân Zekeriya b. Süleyman ve Ahmed b. <> Abdullah nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan mezbûr Selman vekâleten meclis-i şer‘-i hatîr-i lâzımü’t-tevkīrde hâlâ mumcular kethudâsı işbu bâ‘isü’l-kitâb Derviş el-Hâc İbrahim Ağa b. Kasım mahzarında bi’l-esâle ve bi’l-vekâle ikrâr ve takrîr-i kelâm edip karye-i mezbûrede sâkin iken bundan akdem vefât eden babam mezbûr İsmail b. Mehmed’den müntakil bi’l-icâreteyn taht-ı tasarrufumuzda olup sâlifü’z-zikr Yedikule hâricinde kâin kezâlik ma‘lûmü’l-hudûd bir bâb vakıf mumhâne ile mahrûse-i Galata’da Kalora kapısı kurbünde kâin kezâlik ma‘lûmü’l-hudûd bir bâb mumhâne icârelerini müstecirleri olan ma‘lûmü’l-esâmî kimesnelerden ahz ü kabz ve makbûzunu bize îsâl ve teslîme mezbûr Derviş el-Hâc İbrahim Ağa mukaddemâ bâ-hüccet-i şer‘iye vasî nasb ve ta‘yîn olunmağla bin yüz seksen yedi senesi Martı ibtidâsından doksan altı senesi Şubatı gāyetine gelince dokuz senede zikr olunan mumhâne icârelerini mezbûr Derviş el-Hâc İbrahim Ağa beher sene müstecirlerinden bi’l-vesâye ba‘de’l-ahz ve’l-kabz sinîn-i mezkûrede makbûzu olan icârenin yedi seneliğini mukaddemâ bize îsâl ve teslîm eyledikde biz dahi ahz ü kabz etmiş idik. El-hâletü hâzihî iki senede makbûzu olan iki yüz guruşu dahi hâlâ bana def‘ ü teslîm eyledikde ben dahi yedinden bi’l-asâle ve bi’l-vekâle yedinden tamamen ahz ü kabz edip husûs-ı mezkûra ve sâire müte‘allika âmme-i de‘âvî ve kâffe-i mutâlebâtdan mezbûr Derviş el-Hâc İbrahim Ağa ile vasîyy-i mezbûr üzerine nâzır Süleyman b. Ali’den her birinin zimmetlerini ibrâ-i âmm-ı kātı‘u’n-nizâ‘la bi’l-asâle ve bi’l-vekâle ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î. Fî 6 min-C sene 1197 Eş-şâhidûnü’s-sâbıkūn.