Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 442 Hüküm no: 494 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ahmed’in gözünü yaralaması sebebiyle Ahmed b. Süleyman aleyhine açtığı davadan sulh bedeli karşılığı vazgeçtiği Darb da‘vâsına ve mâ-yahdüsü anhe müte‘allika da‘vâdan ibrâ Mahmiye-i İslâmbol’da Sîmkeş mahallesinde sâkin Mehmed b. Ahmed nâm kimesne meclis-i şer‘-i şerîf-i enverde işbu bâ‘isü’l-kitâb Ahmed b. Süleyman nâm kimesne mahzarında ikrâr ve takrîr-i kelâm edip mezbûr Ahmed târih-i kitâbdan yirmi iki ay mukaddem mahalle-i mezbûrede vâki‘ kahve dükkânında eliyle benim sağ gözüme hatâen darb ve darb-ı mezkûrundan müte’essir zikr olunan gözüme za‘f târî olmağla mûcib-i şer‘îsini ben bu esnâda mezbûr Ahmed’den taleb ve da‘vâya tesaddî etmiş idim. El-hâletü hâzihî beynimizde muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni mezbûr Ahmed ile yirmi beş guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr yirmi beş guruşu mezbûr Ahmed yedinden tamamen ahz ü kabz edip husûs-ı mezkûra ve mâ-yahdüsü anhe müte‘allika âmme-i de‘âvî ve kâffe-i mutâlebâtdan mezbûr Ahmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 10 min-C sene 1197 Şühûdü’l-hâl: Mehmed Ârif Efendi b. Hüseyin imâm, Abdülgani b. Abdullah, Kazgancıoğlu Ali, İnekcioğlu Mehmed Emin b. ( ), Topçuoğlu Mehmed b. ( ), Hacı Hüseyin b. Osman, Hacı Hasan b. Osman, Molla Ali b. Halil ve gayruhum.