Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 443 Hüküm no: 495 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Ayşe bt. İsmail’in annesi Zeliha bt. Abdullah’a bazı ziynet eşyalarını hibe ve bir cariye ile bazı eşyalarını da sattığı Arab câriye kızı vâlidesine (...) ve eşyâ mübâya‘ası ma‘a hibe Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Âişe bt. İsmail nâm hatun meclis-i şer‘-i şerîf-i enverde vâlidesi olup kezâlik zâtı mu‘arrefe olan işbu bâ‘isetü’l-kitâb Zeliha bt. Abdullah nâm hatun mahzarında ikrâr ve takrîr-i kelâm edip yedimde mâlım olan otuz miskāl bir çift altın bilezik ve elmas taşlı bir çift altın küpe ve bir elmas gerdâniye ve elmas taşlı bir çift altın kuşak ve bir çift sagīr altın kuşak ve iki altın yüzük ve bir sîm gülâbdân ma‘a buhurdân ve on sîm zarf ve bir sîm tabağımı hibe-i sahîha-i şer‘iye ile vâlidem mezbûre Zeliha Hatun’a hibe ve temlik ve teslîm eylediğimde ol dahi meclis-i hibede bilâ-mâni‘ ittihâb ve temellük ve tesellüm ve kabz ve kabûl eyledikden sonra hâlâ bana rıkkıyeti mu‘terife olan Tensurh ismiyle müsemmât bir re’s orta boylu câriyem ile eşyâ-i memlûkemden kıtık memlû on dört baş çatması yasdık ve altı minder ve üç çuka mak‘ad ma‘a şilte ve dört yüz yasdığı ve üç mak‘ad ve bir sagīr minder ve bir orta keçesi ve bir işleme kapı perdesi ve bir işleme çuka seccâde ve iki döşek ma‘a şilte ve iki baş yasdığı ve dört çaşreb kumaşı ve yemeni beş yorgan ma‘a çârşeb ve iki destâr örtüsü ve beş işleme havlu ve on iş makramesi ve iki işleme peşkir ma‘a sofra ve beş çevre ve beş yağlık bürüncük ve hilâlî ve penbe çul on gömlek ma‘a don ve on uçkur ve bir sevâyîye? kaplı semmûr kürk def‘a bir sevâyîye? kaplı kākum kürk şalı ve çiçekli ve keremsûd dokuz entari ve bir şerîtli şal cübbe ve bir sâde şal cübbe ve bir top çiçekli ve bir keremsûda kaplı keçi kürkü ve bir çiçekli şalvar ve iki şalî çakşır ve on fincan ve bir anbar ve bir servi sandık ve bir sîm kaplı sandık ve bir mükemmel hamam rahtı ve dört işleme boğça ve beş kahve makramesi ve bir iskemle ma‘a faraş ve beş tencere ma‘a kapak ve on beş sahan ma‘a kapak ve iki lenger ma‘a kapak ve iki tas ma‘a kapak ve iki kefgir ma‘a kefçe ve iki tâbe ve iki güğüm ve iki sini ve iki tepsi ve iki duhân tablası ve iki hamam tası ve iki kül kutusu ve dört kahve ibriği ve iki leğen ma‘a ibrik ve bir âbdest leğeni ve iki pirinç tabla ve üç pirinç şamdan ve yirmi değirmi yemeni ve bir çuka ferâce ve bir yaşmak ma‘a makrame ve bir âbdest fotası ve yirmi zirâ‘ iplik ve bir çehre bürüncük ve iki sepet sandığımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile vâlidem mezbûre Zeliha Hatun’a altı yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr altı yüz guruş mutâlebesinden vâlidem mezbûre Zeliha Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan halîle vâlidem mezbûre Zeliha Hatun’un mülk-i mevhûbesi ve zikr olunan câriye ile eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 11 min-C sene 1197 Şühûdü’l-hâl: İmâm Mehmed Emin Efendi, Lütfullah b. Mehmed, Berber Mustafa b. Abdullah, Molla Ali b. Halil, Molla Mehmed b. Mustafa.