Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 444 Hüküm no: 496 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin-i Cev mahallesinden Zeyneb Hatun’un evini kocasına sattığı Nısf menzil mübâya‘ası Mahmiye-i İslâmbol’da Topkapısı dâhilinde Emîn-i Cev mahallesinde sâkine Zeyneb Hatun bt. İbrahim tarafından husûs-ı âti’l-beyânı ikrâra vekîl olduğu zât-ı mezbûreyi [ârifân] Hüseyin Efendi b. Ahmed ve Mehmed Beşe b. Hasan nâm kimesneler şehâdetleriyle şer‘an sâbit olan mahalle-i mezbûre imâmı Osman Efendi b. Veliyüddin meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb Hasan b. Abdullah nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûre Zeyneb Hatun’un bâ-hüccet-i şer‘iye şirâen yedinde mülk ve hakkı olup mahalle-i mezbûrede vâki‘ iki tarafdan mahalle-i mezbûre avârızı vakfından Âişe Hatun tasarrufunda olan menzil ve bir tarafdan Hoca Hatun menzili ve bir tarafdan tarîk-i âm ile mahdûd fevkānî bir bâb oda ve tahtapûş ve matbah ve tahtında bir harâb oda yeri ve kenîf ve bir mikdâr havluyu müştemil bir bâb mülk menzilinin nısf-ı şâyi‘ini yedinde ba‘de’l-ibkā ve nısf-ı şâyi‘-i âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile zevci mezbûr Hasan’a yetmiş beş guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yetmiş beş guruş mutâlebesinden müvekkilem mezbûre Zeyneb Hatun zevci mezbûr Hasan’ın zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm menzil-i mahdûd-ı mezkûrun nısf-ı şâyi‘inde müvekkilem mezbûre Zeyneb Hatun’un aslâ alâka ve medhali kalmayıp zevci mezbûr Hasan’ın mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a. Fî 11 min-C sene 1197 Şühûdü’l-hâl: Berber el-Hâc Yusuf, el-Hâc Mehmed, el-Hâc Salih Duhânî, Haseki Mustafa Ağa, Mehmed Beşe b. Hasan, Hüseyin Efendi b. Ahmed, Molla Ali b. Halil ve gayruhum.