Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 445 Hüküm no: 497 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Subaşı mahallesinden Hadice bt. Ali’nin Atiyetullah Hanım’ın yanında çalışması Îcâr ve istîcâr Mahmiye-i İslâmbol’da Cafer Subaşı mahallesinde sâkine takrîben on dört yaşında olup cüssesinin dahi bulûğa tahammülü olmağla rü’yet-i dem-i hayzla bulûğunu mu‘terife ve zâtı vech-i şer‘î üzere mu‘arrefe olan Hadice bt. Ali nâm bikr-i bâliğa meclis-i şer‘-i hatîrde kezâlik zâtı vech-i şer‘î üzere mu‘arrefe olan bâ‘isetü hâze’l-kitâbi’l-müstetâb Atiyetullah Hanım bt. Mehmed Kemaleddin Efendi mahzarında ikrâr-ı tam ve takrîr-i kelâm edip bundan akdem mûmâ-ileyhâ Atiyetullah Hanım beni yanına alıp menzilinde istihdâm etmekle ben dahi mûmâ-ileyhâya hizmet etmek içün târih-i kitâbdan beher şehir ücret tesmiyesiyle nefsini mûmâ-ileyhâ Atiyetullah Hanım’a îcâr ve teslîm ve ücret-i müsemmâ-yı mezkûremi benim nafaka ve kisveme harc ü sarfa mûmâ-ileyhâ Atiyetullah Hanım’a emr ve tarafımdan tevkîl eylediğimde ol dahi istîcâr ve tesellüm ve kabûl ve ber-vech-i muharrer infâk ve iksâya ta‘ahhüd eyledi dedikde gıbbe’t-tasdîki’ş-şer‘î. Fî 11 min-C sene 1197 Şühûdü’l-hâl: Müderrisîn-i kirâmdan Abbaszâde Feyzullah Efendi b. Mustafa Efendi, Molla Mehmed b. Osman, Müezzin İsmail Efendi b. Hüseyin, Süleyman Ârif Molla b. Yusuf Ziyaeddin, Molla İsmail Lokmacı ve gayruhum.