Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 446 Hüküm no: 498 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin mahallesinden Fatma bt. Süleyman’ın kocasındaki hakkı olan mehrinin bir kısmını hibe ettiği Mehrini hibe Mahmiye-i İslâmbol’da Samatyakapısı dâhilinde el-Hâc Hüseyin mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Fatıma bt. Süleyman nâm hatun meclis-i şer‘-i şerîf-i enverde hâlâ zevci işbu bâ‘isü’l-kitâb Mehmed Said Beşe b. el-Hâc Yusuf nâm kimesne mahzarında ikrâr ve takrîr-i kelâm edip zevcim mezbûr Mehmed Said Beşe zimmetinde ma‘kūdun-aleyh olan altmış guruş mehr-i müeccelimin on guruşunu zevcim mezbûr zimmetinde ba‘de’l-ibkā mâ‘adâ elli guruşunu hibetü’d-deyn mimmen aleyhi’d-deyn sahîhatün fehvâsınca zevcim mezbûr Mehmed Said Beşe’ye hibe ve temlik eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl eyledi, ba‘de’l-yevm mehr-i mezkûr altmış guruşun elli guruşundan zevcim mezbûr Mehmed Said Beşe’nin zimmeti berî olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî 12 min-C sene 1197 Şühûdü’l-hâl: Osman Efendi b. Ahmed imâm-ı mahalle-i mezbûre, Müezzin Mehmed b. Mehmed, es-Seyyid Salih b. Halil, es-Seyyid Mehmed b. Ahmed, İbrahim b. Mustafa, Molla Mehmed b. Osman, Molla Ali b. Halil.