Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 446 Hüküm no: 499 Orijinal metin no: [72b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bucakbağı mahallesinden Ayşe bt. Abdullah’ın yanmış ev enkazı ile arsasını Esma bt. Hüseyin’e sattığı Arsa mübâya‘ası Mahmiye-i İslâmbol’da Yedikulekapısı dâhilinde Bucakbağı mahallesinde sâkine Âişe bt. Abdullah nâm hatun tarafından husûs-ı âti’l-beyânı ikrâra vekîl olduğu zâtını ârifân Molla Mustafa b. Halil ve Ahmed b. Mehmed nâm kimesneler şehâdetleriyle şer‘an sâbit olan es-Seyyid Hüseyin b. es-Seyyid Hasan meclis-i şer‘-i hatîrde mu‘arrefetü’z-zât işbu bâ‘isetü’l-kitâb Esma bt. Hüseyin nâm hatun mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûrenin bâ-hüccet-i şer‘iye şirâen yedinde mülk ve hakkı olup mahmiye-i mezbûrede Davudpaşa mahallesinde vâki‘ bir tarafdan ba‘zan Âişe Hatun ve ba‘zan Yağlıkçı zevcesi Fatıma Hatun arsaları ve bir tarafdan diğer Âişe Hatun arsası ve bir tarafdan Hanife Hatun arsası ve taraf-ı râbi‘i tarîk-i hâs ile mahdûd ve terbî‘an doksan bir zirâ‘ arsa derûnunda mevcûd enkāz-ı ma‘lûme ve bir bi’r-i mâyı müştemil bir bâb muhterik mülk menzil arsasının beher zirâ‘ı kırk beşer paraya olmak üzere tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Esma Hatun’a yüz iki guruş on beş paraya bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz iki guruş on beş parayı müvekkilem mezbûre Âişe Hatun mezbûre Esma Hatun yedinden tamamen ahz ü kabz eyledi, ba‘de’l-yevm arsa-i mahdûde-i mezkûre enkāz-ı mevcûdesiyle mezbûre Esma Hatun’un mülk-i müşterâsı ve hakk-ı sarfı olup müvekkilem mezbûre Âişe Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 12 min-C sene 1197 Şühûdü’l-hâl: Es-Seyyid Süleyman b. Mustafa, Musa Beşe b. Mehmed, Ali b. Hasan, Molla Mustafa b. Halil, Molla Ali b. Halil, Ahmed b. Ahmed.