Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 451 Hüküm no: 505 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Arif Çelebi’nin, Timur mahallesindeki yanmış ev arsası ile alakalı Ali Odabaşı Ağa ile Rabia Hatun’un zimmetini ibra ettiği Menzil hissesinden ibrâ Mahmiye-i İslâmbol’da el-Hâc Timur mahallesinde sâkin es-Seyyid Mehmed Ârif Çelebi b. Ali nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb kendi nefsinden asîl ve zevci Ali Odabaşı Ağa b. Mustafa nâm kimesne tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan min-kıbeli’l-üm ceddesi mu‘arrefetü’z-zât Rabia Hatun bt. Mehmed mahzarında ikrâr-ı tam ve takrîr-i kelâm edip mahalle-i mezbûrede vâki‘ bir tarafdan Kahveci el-Hâc Mustafa veresesi menzili ve bir tarafdan ceddem mezbûre Rabia Hatun tasarrufunda olan vakıf menzil ve ba‘zan es-Seyyid Mehmed menzili ve iki [tarafdan] tarîk-i âm ile mahdûd ma‘lûmü’l-müştemilât bir bâb mülk menzil bundan akdem vefât eden min-kıbeli’l-üm ceddim es-Seyyid Mehmed Ağa b. Musli’nin hayatında ile’l-vefât yedinde mülk ve hakkı ve ba‘de vefâtihî menzil-i mezkûrun semeni zevcesi ceddem mezbûre Rabia Hatun’a ve seb‘a-i esmânı farzan ve redden sulbiye kızı vâlidem Şerife Ümmügülsüm’e mevrûs olup lâkin ceddim mezbûr es-Seyyid Mehmed Ağa’nın hîn-i vefâtında vâlidem mezbûre Ümmügülsüm sagīre bulunup menzil-i mahdûd-ı mezkûrda olan yedi sehm hisse-i şâyi‘asından gayrı kendüyü infâk eder mâlı olmamağla vâlidem mezbûrenin tesviye-i umûrunu rü’yete kıbel-i şer‘den bâ-hüccet-i şer‘iye vasîyy-i mansûbesi vâlidesi ceddem mezbûre Rabia Hatun bir kıt‘a izin hücceti mantûkunca menzil-i mezkûrdan i‘tibâr-ı mezkûr üzere vâlidem mezbûrenin yedi sehm hisse-i şâyi‘asını Kilârî es-Seyyid Mustafa Ağa’ya semen-i misli ile bi’l-vesâye bey‘ ve kabz-ı semen eyledikden sonra mezbûr Kilârî es-Seyyid Mustafa Ağa dahi menzil-i mahdûd-ı mezkûrdan şirâen mâlik olduğu sihâm-ı mezkûru semen-i ma‘lûm ve makbûza yine ceddem mezbûre Rabia Hatun’a bey‘ ve temlik ve teslîm edip mecmû‘-ı menzil-i mahdûd-ı mezkûr ceddem mezbûrenin irsen ve şirâen müstakılleten mülk ve hakkı iken ceddem mezbûre Rabia Hatun menzil-i mahdûd-ı mezkûrun nısf-ı şâyi‘ini zevci müvekkil-i mezbûr Ali Odabaşı Ağa’ya semen-i ma‘lûm ve makbûza bey‘ ve temlik ve teslîm edip ol-vechile menzil-i mezkûr bi’l-münâsafe ceddem mezbûre Rabia Hatun ile zevci müvekkil-i mezbûr Ali Odabaşı Ağa’nın yedlerinde mülkleri olduğu hâlde bundan akdem vukū‘ bulan harîk-i kebîr-i gālibde menzil-i mahdûd-ı mezkûr bi’l-külliye muhterik olup arsa sırfa kalmağla arsa-i mahdûde-i mezkûrenin i‘tibâr-ı mezkûr üzere yedi sehm şâyi‘ine müte‘allika âmme-i de‘âvî ve kâffe-i mutâlebâtdan ceddem mezbûre Rabia Hatun ile zevci müvekkil-i mezbûr ali Odabaşı Ağa’dan her birinin zimmetlerini ibrâ-i âm ile ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb. Fî 15 min-C sene 1197 Şühûdü’l-hâl: Hafız İbrahim Efendi b. Ali imâm-ı mahalle-i mezbûre, Ali Çavuş Ağa b. Mustafa, Ali Efendi b. İsmail, es-Seyyid Mehmed Çavuş Ağa b. Mesud, Mustafa Çavuş Ağa b. Ali, Halîfe Ahmed Efendi b. Mustafa, Kethudâzâde İbrahim Efendi b. Halil, Hafız Molla Abdurrahman b. İsmail, Hamza Çavuş b. Mehmed, Molla Ali b. Halil.