Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 452 Hüküm no: 506 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Timur mahallesinde içinde mülkname hüccetiyle yanmış olan evin Ali Odabaşı Ağa ile hanımı Rabia Hatun’a ait olduğuna dair şahitler olduğu İstihbâr-ı menzil Mahmiye-i İslâmbol’da el-Hâc Timur mahallesinde sâkinler işbu bâ‘isü’l-kitâb kendi nefsinden asîl ve hâlâ zevci Ali Odabaşı Ağa b. Mustafa tarafından ber-vech-i âtî vekîl olduğu Hafız Molla Abdurrahman b. İsmail ve Hamza Çavuş Ağa b. Mehmed nâm kimesneler şehâdetleriyle şer‘an sâbit ve zâtı şâhidân-ı mezbûrân ta‘rîfleriyle mu‘arrefe olan Rabia Hatun bt. Mehmed meclis-i şer‘-i hatîr-i lâzımü’t-tevkīrde bi’l-asâle ve bi’l-vekâle takrîr-i kelâm ve bast-ı merâm edip mahalle-i mezbûrede vâki‘ bir tarafdan Kahveci el-Hâc Mustafa veresesi menzili ve bir tarafdan benim tasarrufumda olan vakıf menzil ve ba‘zan es-Seyyid Mehmed menzili ve iki tarafdan tarîk-i âm ile derûnunda bir bi’r-i mâ ve müştemilât-ı sâireyi hâvî bir bâb mülk menzil sekiz sehm i‘tibârıyla bir sehmi irsen ve yedi sehmi şirâen mülk ve hakkım olduğu hâlde ben menzil-i mahdûd-ı mezkûrun nısf-ı şâyi‘ini zevcim müvekkilim mezbûr Ali Odabaşı Ağa’ya semen-i medfû‘ ve ma‘lûma bey‘ ve temlik ve teslîm ve ol dahi ba‘de’l-iştirâ ve’t-temellük ve’t-tesellüm ve’l-kabûl ol-vechile menzil-i mahdûd-ı mezkûrun nısf-ı şâyi‘i benim ve nısf-ı şâyi‘-i âharı dahi zevcim müvekkilim mezbûr Ali Odabaşı Ağa’nın yedimizde mülk ve hakkımız iken menzil-i mahdûd-ı mezkûr ile yedimizde olan mülknâme hüccetlerimiz bundan akdem vukū‘ bulan harîki kebîr-i gālibde bi’l-külliye muhterik olmağla takrîrim zabt ve tahrîr ve husûs-ı mezkûra vukūf-ı tammı olan bî-garaz Müslimînden suâl ve istihbâr ve haberleri hüccet olunmak bi’l-asâle ve bi’l-vekâle matlûbumdur dedikde hakīkat-i hâl bi’l-cümle mukırre-i mezbûre Rabia Hatun’un bâlâda bast ü beyân ve şerh ü ayân eylediği minvâl üzere olduğunu mahalle-i mezbûre ahâlisinden İmâm Hafız b. İbrahim Efendi b. Ali ve Müezzin Molla Mehmed Said b. Mehmed ve Ali Efendi b. İsmail ve İsmail Ağa b. Mustafa ve es- Ağa b. Mesud ve Mustafa Çavuş Ağa b. Ali ve Ali Çavuş Ağa b. Mustafa nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl mâ-vaka‘a bi’t-taleb. Fî 15 min-C sene 1197 Eş-şâhidûnü’s-sâbıkūnü’s-sâbıkūn ve gayruhum.