Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 453 Hüküm no: 507 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Odabaşı Ağa ile hanımı Rabia Hatun’un Timur mahallesindeki yanmış ev arsasını üç ay önce Mehmed Ağa’ya satmış oldukları Arsa mübâya‘ası Mahmiye-i İslâmbol’da el-Hâc Timur mahallesinde sâkinler kendi nefsinden asîl ve zevci Ali Odabaşı Ağa b. Mustafa tarafından husûs-ı âti’l-beyânı ikrâra vekîl olduğu Hafız Molla Abdurrahman b. İsmail ve Hamza Çavuş Ağa b. Mehmed nâm kimesneler şehâdetleriyle şer‘an sâbit ve zâtı zeyl-i sahîfede mektûbü’l-esâmî Müslimîn ta‘rîfleriyle mu‘arrefe olan Rabia Hatun bt. Mehmed meclis-i şer‘-i hatîr-i lâzımü’t-tevkīrde işbu bâ‘isü’l-kitâb el-Hâc Mehmed Ağa b. Ali’nin kayınpederi ve tarafından ber-vech-i âtî tasdîka vekîl olduğu nehc-i şer‘î ve tarîk-i mer‘î üzere sâbit olan Mehmed Efendi b. Ali mahzarında bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Kahveci el-Hâc Mustafa veresesi menzili arsa[sı] ve bir tarafdan benim tasarrufumda olan vakıf menzil arsası ve ba‘zan es-Seyyid Mehmed arsası ve iki tarafdan tarîk-i âm ile mahdûd derûnunda bir bi’r-i mâ ve enkāz-ı mevcûdeyi hâvî terbî‘an beş yüz yetmiş beş zirâ‘ bir bâb muhterik mülk menzil arsasının nısf-ı şâyi‘i benim ve nısf-ı şâyi‘-i âharı dahi zevcim müvekkilim mezbûr Ali Odabaşı Ağa’nın bâ-hüccet-i şer‘iye irsen ve şirâen yedimizde mülk ve hakkımız olmağın biz arsa-i mahdûde-i mezkûreyi târih-i kitâbdan üç ay mukaddem tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile müvekkil-i mezbûr el-Hâc Mehmed Ağa’ya iki yüz seksen yedi buçuk guruşa bey‘ ve temlik ve teslîm eylediğimizde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz seksen yedi buçuk guruşu müvekkil-i mezbûr el-Hâc Mehmed Ağa yedinden bi-kadri’l-hısas tamamen ahz ü kabz edip ol-vechile arsa-i mahdûde-i mezkûre târih-i mezbûrdan beri müvekkil-i mezbûr el-Hâc Mehmed Ağa’nın mülk-i müşterâsı ve hakk-ı sarfı olup benim ve müvekkilim mezbûr Ali Odabaşı Ağa’nın kat‘a alâka ve medhalimiz kalmamışdır dedikde gıbbe’t-tasdîki’ş-şer‘î mâ-vaka‘a. Fî 16 min-C sene 1197 Eş-şâhidûnü’s-sâbıkūn.