Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 247 Hüküm no: 202 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödemesi hususunda Arabacı Todori’ye tenbih olunması 1140 guruş tahsîl i‘lâmı Ma‘rûz, Medîne-i Üsküdar’a tâbi‘ Çengel karyesinde sâkin İsmail Bey b. Hüsameddin nâm kimesne Salı günü huzûr-ı hazret-i fetvâ-penâhîde ma‘kūd meclis-i şer‘de derûn-ı arzuhâlde mastûrü’l-ism Arabacı Todori v. Dimitri nâm zimmî muvâcehesinde benim mersûm Todori zimmî zimmetinde bâ-i‘lâm-ı şer‘î mahkûmün-bih on bir bin dört yüz guruş alacak hakkım olmağla meblağ-ı mezkûr on bir bin dört yüz guruş mesfûr Todori zimmîden tahsîl ve bana teslîm olunması murâdımdır deyü da‘vâ etdikde ol dahi cevâbında kaziyye minvâl-i muharrer üzere olduğunu ikrâr ü i‘tirâf edip lâkin deynim olan meblağ-ı mezkûru hâlen ve def‘aten müdde‘î-i merkūma edâya iktidârım olmamağla ol vechile beni te’cîl etmek üzere merkūm İsmail Bey’e cebr olunsun deyü takrîr-i meşrûhu üzere îrâd eylediği kelâmı def‘e sâlih cevâb-ı şer‘î olmamağla alâ-mûcebi i‘tirâfihî meblağ-ı mezkûr on bir bin dört yüz guruş mersûm Todori zimmîden tahsîli müdde‘î-i merkūm İsmail Bey’e teslîm olunması iktizâ eylediği huzûr-ı [âlîlerine i‘lâm olundu]. Fî 26 Ra sene 1257.