Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 248 Hüküm no: 203 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi ile kardeşi Aci Sava arasındaki alacak davasında anlaşma sağlanması Ma‘rûz, Bakkāl tâifesinden arzuhâl eden Kostandi v. Aci Koşer nâm zimmî bi’l-ma‘iyye rü’yete memûr Evkāf Müfettişi fazîletlü semâhatlü es-Seyyid Mehmed Emin Âsaf Beyefendi hâzır olduğu hâlde Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde li-ebeveyn er karındaşı derûn-ı arzuhâlde mastûrü’l-ism Aci Sava zimmî tarafından husûs-ı âti’l-beyânda tasdîka vekîl-i şer‘îsi Yorgi v. Mavridi nâm zimmî muvâcehesinde karındaşım müvekkil-i mersûm Aci Sava zimmî târîh-i i‘lâmdan sekiz sene mukaddem medîne-i Üsküdar’da Etpazarı sûkunda vâki‘ ma‘lûmü’l-hudûd bir bâb şîruganhâne derûnunda mevcûde gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla mâlik olduğum hisse-i ma‘lûmemi emir ve tevkîlimle iki bin guruş semen-i makbûza âhara bey‘ ve teslîm edip lâkin makbûzu olan meblağ-ı mezkûr iki bin guruşu bana vermeyip bi-gayr-ı hakkın kendi umûruna sarfla istihlâk etmekle meblağ-ı mezkûr iki bin guruşu karındaşım müvekkil-i mersûm Aci Sava zimmîden damânen taleb ederim deyü tasaddî eylediğim da‘vâmdan bâ-tavassut-ı muslihîn karındaşı müvekkil-i mersûm ile bi’t-tav‘ ve’r-rızâ altı yüz guruş bedel-i medfû‘ ve makbûza ba‘de akdi’l-musâlaha ve’l-kabûl ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan karındaşım müvekkil-i mersûm Aci Sava zimmînin zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledim deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 25 Ra sene [12]57.