Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 453 Hüküm no: 508 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Emine bt. Mehmed ile Ali Beşe’nin boşandıkları Tatlîk Mahmiye-i İslâmbol’da Altımermer kurbünde Kâtib Muslihiddin mahallesinde sâkine ve zâtı vech-i şer‘î üzere mu‘arrefe olan Emine bt. Mehmed nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb es-Seyyid Ali Beşe b. es-Seyyid Abdullah nâm kimesne mahzarında ikrâr ve takrîr-i kelâm edip mezbûr es-Seyyid Ali Beşe zevc-i dâhilim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan yirmi guruş mehr-i müeccelim ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan beş guruş ki cem‘an yirmi beş guruşu zevc-i mutallıkım mezbûr es-Seyyid Ali Beşe işbu meclis-i şer‘de bana def‘ ve teslîm eyledikde ben dahi yedinden tamamen ahz ü kabz edip hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr es-Seyyid Ali Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 16 min-C sene 1197 Şühûdü’l-hâl: Mehmed Memiş b. Mehmed, Molla Ali b. Halil, Salih b. Halil, Ali Ağa b. Mehmed, el-Hâc Hasan b. Osman.