Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 454 Hüküm no: 509 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirahor mahallesinden Keziban bt. Hasan ile Ahmed b. Mehmed’in boşandıkları Muhâla‘a Mahmiye-i İslâmbol’da Mirâhor mahallesinde sâkine ve zâtı vech-i şer‘î üzere mu‘arrefe olan Keziban bt. Hasan nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Ahmed b. el-Hâc Mehmed nâm kimesne mahzarında ikrâr ve takrîr-i kelâm edip mezbûr Ahmed zevcim olup lâkin beynimizde hüsn-i mu‘âşeretimiz olmamağla üç def‘a akidde müsemmâ zimmetinde mütekarrer ve ma‘kūdun-aleyh olan otuz altı guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ahmed ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 18 min-C sene 1197 Şühûdü’l-hâl: Cevrî Mustafa Beşe, Süleyman Beşe b. Mehmed, es-Seyyid Ali b. Hüseyin, Molla Mehmed b. Mustafa, Molla Ali b. Halil, Salih b. Halil.