Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 455 Hüküm no: 510 Orijinal metin no: [74a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslen Kastamonulu olup Parmakkapı’da misafiren bulunan Ali Bey ile Mustafa Çavuş arasındaki esame ferağı anlaşmazlığına son verildiği Esâme mukābelesinde ferâğ ve esâmeler ibrâsı Vilâyet-i Anadolu’da Kastamonu sancağında Boyabad kazâsına muzâfe Karaçayırı nâhiyesine tâbi‘ Avanos nâm karye ahâlisinden olup mahmiye-i İslâmbol’da Parmakkapı kurbünde kitâbçı dükkânında müsâfiren sâkin Ali Bey b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid Mustafa Çavuş Ağa b. el-Hâc Mehmed Emin mahzarında ikrâr-ı tam ve takrîr-i kelâm edip sipâh ocağında elli yedinci bölükde Ali Mehmed nâm ismiyle mutasarrıf olduğum yevmî yirmi dört akçe eşkinci esâmîmin ibtidâ ta‘bîr olunur tezkiresini bin yüz seksen senesi[nde] mezbûr es-Seyyid Mustafa Çavuş Ağa’ya bi’l-emâne def‘ ve teslîm ve müstahık oldukça ulûfesini mezbûr es-Seyyid Mustafa Çavuş Ağa yedinden ahz ü kabz etmiş idim. Lâkin zikr olunan esâmînin ibtidâsını mezbûr es-Seyyid Mustafa Çavuş Ağa’dan bu esnâda taleb ve da‘vâ eylediğimde ol dahi cevâbında esâmî-i mezkûru bedel-i ma‘lûm mukābelesinde âhara ferâğ ve bedeli ile üzerine ber-tekā‘üd esâmî yapdırmak üzere bundan akdem bana emretmişdin deyü beni def‘e tesaddî ve bu vechile beynimizde münâza‘ât-ı kesîre cereyân etmiş idi. El-hâletü hâzihî beynimizde muslihûn tavassutuyla mezbûr es-Seyyid Mustafa Çavuş Ağa ocağ-ı mezkûrda yüz kırk üçüncü bölükde Musa Satılmış Antalya ismiyle mutasarrıf olduğu yevmî on dört akçe tekā‘üd esâmîsini kendi hüsn-i rızâ ve ihtiyârıyla bana ferâğ ve bi’l-külliye kasr-ı yed edip ibtidâ ta‘bîr olunur tezkiresini dahi bana def‘ ve teslîm eyledikde ben dahi yedinden kabz ve tesellüm etmemle ben zikr olunan yirmi dört akçe esâmeye ve güzeşte ulûfesine müte‘allika âmme-i de‘âvî ve kâffe-i mutâlebâtdan mezbûr es-Seyyid Mustafa Çavuş Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik bana fâriğ olduğu on dört akçe esâmîye müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde mezbûr es-Seyyid Mustafa Çavuş Ağa dahi mukırr-ı mezbûr Ali Bey’i cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb ketb olundu. Fî 17 min-Cumâdelâhire sene 1197 Şühûdü’l-hâl: Mustafa Çavuş Ağa b. Şaban, Hüseyin Sipâhî b. Ahmed, Ahmed Sipâhî b. Ali, Şehri Mehmed Ağa b. Mehmed, Molla Ali b. Halil, Ahmed Çavuş Ağa b. Mustafa, Uzun Mehmed Çavuş ağa b. ( ), Berber Molla Ahmed b. Hüseyin, Hancı Süleyman Usta b. ( ) ve gayruhum.