Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 456 Hüküm no: 511 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman ve Hadice’ye kefil olan Mehmed Haşim Efendi’nin parayı alacaklı olan Ayşe bt. Ali’ye ödediği Kefîl deyni edâ ve ibrâ hücceti Mahrûse-i Galata muzâfâtından Kasımpaşa kasabasında Çitlenbik mahallesinde sâkine ve zâtı vech-i şer‘î üzere mu‘arrefe olan Âişe bt. Ali nâm hatun meclis-i şer‘-i şerîf-i enverde işbu bâ‘isü’l-kitâb hâlâ Koca Mustafa Paşa Câmi‘-i şerîfi şeyhi es-Seyyid Mehmed Haşim Efendi b. el-Hâc Bâyezid tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan türbedâr Nureddin Efendi b. Mustafa mahzarında ikrâr ve takrîr-i kelâm edip benim işbu hâzırân bi’l-meclis el-Hâc Osman b. Halil ve mu‘arrefetü’z-zât Arab Hadice bt. Abdullah nâm zevcân zimmetlerinde eşyâ-i mütenevvi‘a-i ma‘lûme semeninden kırk guruş alacak hakkımın edâsına tarafeynden emr ve kabûlü hâvî kefâlet-i sahîha ile mûmâ-ileyh kefîl ve zâmin olmuş idi. El-hâletü hâzihî mûmâ-ileyh Mehmed Haşim Efendi meblağ-ı mezbûr kırk guruşu kefâletine binâen bana def‘ ve teslîm etmekle ben dahi yedinden tamamen ahz ü kabz edip meblağ-ı mezbûrdan mûmâ-ileyh yed ve kıbelinde bir akçe ve bir habbe hakkım bâkī kalmamağla meblağ-ı mezbûr kırk guruşa müte‘allika âmme-i de‘âvî ve kâffe-i mutâlebâtdan mûmâ-ileyh es-Seyyid Mehmed Haşim Efendi ile zevcân-ı mezbûrân el-Hâc Osman ve Hadice’den her birinin zimmetlerini ibrâ ve ıskāt eylediğimde onlar dahi ibrâmı ve kabûl eylediler dedikde gıbbe’t-tasdîki’ş-şer‘î mâ-vaka‘a. Fî 17 min-C sene 1197 Şühûdü’l-hâl: Veliyüddin b. Nasrullah, Mehmed Emin Dede b. Hüseyin, Mustafa Dede b. Mustafa, Harbeci Mustafa Beşe, Molla Ali b. Halil.