Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 456 Hüküm no: 512 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Âkıle bt. Mustafa’nın boşandığı eşi Yakub Ağa’daki mehrine karşılık bazı eşyalar aldığı Tatlîk ve mehri mukābelesinde bir mikdâr eşyâ ahz Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe olan Âkıle bt. Mustafa nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb el-Hâc Yakub Ağa b. Ahmed nâm kimesne mahzarında ikrâr-ı tam ve takrîr-i kelâm edip mezbûr el-Hâc Yakub Ağa zevc-i dâhilim olduğu hâlde târih-i kitâb günü beni bâyinen tatlîk etmekle iki def‘a akidde müsemmâ zimmetinde ma‘kūdun-aleyh olan yirmi dokuz guruş mehr-i müeccel hakkım ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan beş guruş ki cem‘an otuz dört guruş mukābelesinde bana mâlından bir sîm pandül sâ‘at ve yedi sîmli bağa? ve yedi yeşim taşlı iki kutu ve bir kehribârlı duhân geçmesi? ve bir ihrâmını def‘ ü teslîm eyledikde ben dahi yedinden tamamen ahz ü kabz edip hukūk ve sâire müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr el-Hâc Yakub Ağa’nın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 18 min-C sene 1197 Şühûdü’l-hâl: Ömer Efendi b. Mehmed imâm-ı mahalle-i mezbûre, Müezzin Abdi Efendi b. Mehmed, Ebûbekir Efendi b. Osman, Mumcu Abdullah Beşe, Osman Beşe b. Osman, Mustafa b. Ahmed, Ahmed Odabaşı b. ( ), Molla Ali b. Halil ve gayruhum.