Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 457 Hüküm no: 513 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap İlyas mahallesinden Rukiye bt. Mustafa’nın yanmış ev arsasını Musa b. Hamza ile üvey babası Ömer’e satması Müstakılleten mâlike olduğu arsanın 4 sehm i‘tibârıyla üç sehmini birine ve bir sehmini dahi birine mübâya‘a Mahmiye-i İslâmbol’da Kasab İlyas mahallesinde sâkine Rukiye bt. Mustafa nâm hatun tarafından bey‘i âti’z-zikri ikrâra vekîl olduğu zâtını ârifân es-Seyyid Mustafa Dede b. es-Seyyid Ömer ve Osman Dede b. Ömer şehâdetleriyle şer‘an sâbit olan eş-Şeyh İdris Efendi b. Mehmed meclis-i şer‘-i şerîf-i enverde işbu bâ‘iseyü’l-kitâb es-Seyyid Musa b. Hamza ile üvey babası Ömer b. Hüseyin nâm kimesneler mahzarlarında ikrâr-ı tam ve takrîr-i kelâm edip akd-i âti’z-zikrin sudûruna değin müvekkilem mezbûre Rukiye Hatun’un bâ-hüccet-i şer‘iye şirâen yedinde mülk ve hakkı olup mahalle-i mezbûrede vâki‘ üç tarafdan müvekkilem mezbûrenin tasarrufunda olan vakıf arsa ve taraf-ı râbi‘i tarîk-i âm ile mahdûd müşterek bir bi’r-i mâyı müştemil yüz otuz zirâ‘ bir bâb muhterik mülk menzil arsasının dört sehm i‘tibârıyla üç sehm-i şâyi‘ini mezbûr es-seyyid Musa’ya ve bir sehm-i şâyi‘ini mezbûr Ömer’e tarafeynden îcâb ve kabûlü hâvî bey‘-i bâtt-ı sahîh-i şer‘î ile seksen bir guruşa bey‘ ve temlik ve teslîm eylediğinde onlar dahi ber-vech-i muharrer iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr seksen bir guruşu müvekkilem mezbûre Rukiye Hatun mezbûrân es-Seyyid Musa ve Ömer yedlerinden tamamen ahz ü kabz eyledi, ba‘de’l-yevm arsa-i mahdûde-i mezkûrenin i‘tibâr-ı mezkûr üzere üç sehm-i şâyi‘i mezbûr es-Seyyid Musa’nın ve bir sehm-i şâyi‘i mezbûr Ömer’in mülk-i müşterâları ve hakk-ı sarfları olup müvekkilem mezbûre Rukiye Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î. Fî 19 min-C sene 1197 Şühûdü’l-hâl: Sivaslıoğlu el-Hâc Ahmed Efendi, Kantarcı es-Seyyid Ahmed b. Hüseyin, es-Seyyid Süleyman b. Mehmed, Yüzbaşı Ali Ağa b. Ahmed, Ömer b. el-Hâc Ali ve gayruhum.