Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 458 Hüküm no: 514 Orijinal metin no: [74b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çadırcı Ahmed mahallesinden Despino bt. Tanaş’ın bostanda mevcut bazı âlet ile ekili sebzelerini Acı Mihal’e sattığı Bostan gediği mübâya‘ası, 2900 guruşa Mahmiye-i İslâmbol’da Kumkapı dâhilinde Çadırcı Ahmed mahallesinde mütemekkine ve şahsı vech-i şer‘î üzere mu‘arrefe olan Despino bt. Tanaş nâm Nasrâniye meclis-i şer‘-i hatîr-i lâzımü’t-tevkīrde işbu hâmilü’r-rakīm Acı Mihal v. Andon nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Samatya kapısı dâhilinde Ağa Hamamı kurbünde kâin Murad Çavuş Bostanı demekle arîf ma‘lûmü’l-hudûd bir kıt‘a bostan derûnunda mevcûd beyne’l-hıref gedik ta‘bîr olunur bir bi’r-i mâ dolabı ve sonradan mağrûs iki yüz dip eşcâr-ı müsmire ve iki bin ocak hıyar ve yüz ocak kabak ve on altı tahta badincan ve altmış tahta semiz ot ve yirmi tahta turp ve on altı tahta maydanos ve on tahta saluta ma‘a marul ve dört bel ve bir çapa ve iki tarak ve bir tencere ma‘a kapak ve dört arka küfesi ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i kat‘î ve safka-i vâhide ile merkūm Acı Mihal zimmîye iki bin dokuz yüz guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki bin dokuz yüz guruşu merkūm Acı Mihal zimmî yedinden tamamen ahz ü kabz edip mebî‘-i mezkûrun gabn ve tağrîrine [75a] müte‘allika âmme-i de‘âvî ve kâffe-i mutâlebâtdan merkūm Acı Mihal zimmînin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm bostan-ı mezkûr derûnunda gedik ta‘bîr olunan sâlifü’z-zikr dolab ve eşcâr-ı müsmire ve sebzevât-ı mezrû‘a-i mezkûre ve sâir âlât-ı lâzıme-i ma‘lûme merkūm Acı Mihal zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 19 min-C sene 1197 Şühûdü’l-hâl: Es-Seyyid İsmail Ağa b. es-Seyyid İbrahim kethudâ, Mehmed b. Mehmed tâbi‘-i mûmâ-ileyh, Molla Ali b. Halil, el-Hâc Hasan b. Osman ve gayruhum, Yorgi v. Dimo yiğitbaşı, Pando v. Tanaş, Miho v. İstanko, Calo v. Resto, Andon v. Pavli, Mihal v. Kico, Oğlan v. Dimo, Diko v. Koca, Karankıl v. Tarban, Üstüyan v. Niko, Kigo v. Mitro, Nikola v. Esiko, diğer Nikola v. Eftim ve gayruhum.