Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 459 Hüküm no: 515 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi mahallesinden Mustafa Ağa’nın evini İsmail Ağa’ya sattığı Menzil mübâya‘ası Mahmiye-i İslâmbol’da Sulu Manastır kurbünde Abdi Çelebi mahallesinde sâkin Mustafa Ağa b. el-Hâc Mehmed nâm kimesne meclis-i şer‘-i şerîf-i enverde işbu bâ‘isü’l-kitâb İsmail Ağa b. İbrahim nâm kimesne mahzarında ikrâr-ı tam ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup medîne-i Üsküdar’a tâbi‘ Kādı karyesinde Çarıklı mahallesinde vâki‘ bir tarafdan Emine Hatun menzili ve bir tarafdan Kasab Ahmed menzili ve tarafeyni tarîk-i âm ile mahdûd fevkānî iki oda ve bir sofa ve kenîf ve tahtânî bir bâb oda ve matbah ve kömürlük ve bir mikdâr havluyu müştemil bir bâb harâb mülk menzilimi cümle tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İsmail Ağa’ya yüz elli beş guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli beş guruşu mezbûr İsmail Ağa yedinden tamamen ahz ü kabz eyledim ba‘de’l-yevm menzil-i mahdûd-ı mezkûr cemî‘ müştemilâtıyla mezbûr İsmail Ağa’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î. Fî 20 min-C sene 1197 Şühûdü’l-hâl: Mehmed Yazıcı b. Abdullah, el-Hâc Mustafa Ağa b. Hasan, Ömer Çavuş Ağa b. Hüseyin, Molla Mehmed b. Mustafa, es-Seyyid Hüseyin b. Ahmed, Subaşı Ali Ağa b. Yahya, Molla Ali b. Halil ve gayruhum.