Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 459 Hüküm no: 516 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin mahallesinden Osman Ağa ve Ömer Ağa’nın sahip oldukları duhan dükkânındaki hisselerini Hadice bt. Abdullah’a sattıkları Mukāta‘alı arsada mebnî ebniyeden hisse mübâya‘ası, sûret-i kat‘î lâkin hakīkatde kat‘î değildir Mahmiye-i İslâmbol’da Samatya kapısı dâhilinde el-Hâc Hüseyin mahallesinde sâkinler es-Seyyid Osman Ağa ve es-Seyyid Ömer Ağa ibney Ali nâm karındaşlar meclis-i şer‘-i şerîf-i enverde mu‘arrefetü’z-zât işbu bâ‘isetü’l-kitâb Hadice bt. Abdullah nâm hatun mahzarında her biri ikrâr ve takrîr-i kelâm edip mahalle-i mezbûrede vâki‘ ma‘lûmü’l-hudûd iki kepenk bir bâb duhânî dükkânının arsası şehremîni olanlara senevî on akçe mukāta‘a-i kadîme arz-ı mîrî ve binâsının on sehm i‘tibârıyla dört sehm-i şâyi‘i Ümmühani Hatun bt. el-Hâc Mustafa’nın ve üçer sehmden altı sehm-i şâyi‘i bizim bâ-hüccet-i şer‘iye irsen yedimizde mülk ve hakkımız olmağın biz ebniye-i mezkûreden i‘tibâr-ı mezkûr üzere mâlikler olduğumuz altı sehm hisse-i şâyi‘amızı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Hadice Hatun’a üç yüz elli guruşa bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz elli guruşu mezbûre Hadice Hatun yedinden tamamen ahz ü kabz eyledik, ba‘de’l-yevm zikr olunan ebniyenin altı sehm-i şâyi‘i mezbûre Hadice Hatun’un mülk-i müşterâsı olmuşdur dediklerinde gıbbe’t-tasdîki’ş-şer‘î mâ-vaka‘a. Fî 21 min-C sene 1197 Şühûdü’l-hâl: İmâm Osman Efendi b. Ahmed, Müezzin Mehmed b. Osman, Molla Ahmed b. Mustafa, Mehmed Yazıcı b. Abdullah, Musa Beşe b. Ahmed, Molla Ali b. Halil.